1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

معاشرہ

مسافر طیارے میں چوہے اور رن وے پر کتے کے باعث ایمرجنسی

بھارت کی ایئر انڈیا کو ایک دن میں دو ناخوشگوار واقعات کا سامنا کرنا پڑا ہے۔ ایک واقعے کی وجہ ایک چوہا بنا، جسے مسافروں نے دوران پرواز دیکھا۔ دوسرے واقعے میں رن وے پر ایک کتے نے ایک طیارے کی ایمرجنسی بریکیں لگوا دیں۔

بھارتی دارالحکومت نئی دہلی سے جمعرات اکتیس دسمبر کو ملنے والی نیوز ایجنسی ایسوسی ایٹڈ پریس کی رپورٹوں کے مطابق کل بدھ کے روز ملکی فضائی کمپنی ایئر انڈیا کی ایک پرواز جب ممبئی کے ہوائی اڈے سے برطانوی دارالحکومت لندن کے لیے پرواز کر چکی تھی تو متعدد مسافروں نے عملے کے ارکان کو بتایا کہ انہوں نے طیارے میں ایک چوہا دیکھا ہے۔

اس پر پائلٹ کو اطلاع دی گئی تو اس نے فوری طور پر طیارے کو واپس ممبئی میں اتارنے کا فیصلہ کیا۔ وجہ یہ تھی کہ ہوائی جہاز میں موجود کوئی بھی چوہا یا چوہے بجلی اور کمیونیکیشن نظام کی تاریں کتر سکتے ہیں اور یہ بات بہت خطرناک ثابت ہو سکتی ہے۔

ایئر انڈیا نے آج اپنے ایک بیان میں بتایا کہ مسافروں اور عملے کے ارکان کی سلامتی کو یقینی بنانے اور چوہے کو پکڑنے کے لیے اس ہوائی جہاز کو ممبئی میں اتار کر اس کی تلاشی لی گئی لیکن کوئی چوہا نہ ملا۔ بعد میں ان مسافروں کو ایک دوسرے ہوائی جہاز کے ذریعے لندن روانہ کیا گیا۔ جس طیارے میں مسافروں نے چوہا دیکھا تھا، اسے ممبئی ہی میں روک لیا گیا۔

اس جہاز کا دوبارہ کمرشل استعمال اس کی نئے سرے سے انتہائی تفصیلی چیکنگ کے بعد شروع کیا جائے گا۔ اس دوران تکنیکی دیکھ بھال کے ماہرین اس بات کو یقینی بنائیں گے کہ چوہے یا چوہوں نے الیکٹرانک نظام یا وائرنگ کو کوئی نقصان نہ پہنچایا ہو۔ اس کے بعد ہی اس طیارے کے لیے ’چوہوں سے پاک‘ ہونے کا سرٹیفیکیٹ جاری کیا جا سکے گا۔

کل بدھ ہی کے روز ایئر انڈیا کی ایک اور مسافر پرواز کو بھی ایک ناخواشگوار واقعہ پیش آیا۔ بھارتی شہر امرتسر کے ہوائی اڈے پر ایک مسافر طیارہ پرواز سے چند لمحے پہلے تیزی سے ٹیکسی کر رہا تھا کہ پائلٹ کو ایک ایسا لاوارث کتا نظر آیا جو رن وے پر دوڑ رہا تھا۔

امرتسر ایئر پورٹ کے ایک اہلکار کے مطابق یہ کتا رن وے پر عین اس جگہ دوڑ رہا تھا جہاں قریب ہی جہاز کے اگلے پہیے تھے۔ یہ بھانپتے ہوئے کہ اس لمحے کوئی حادثہ پیش آ سکتا تھا، طیارے کے پائلٹ نے ایمرجنسی بریکیں استعمال کیں اور جہاز کو دوبارہ رن وے کے پارکنگ ایریا میں لے آیا۔

Air India Airbus A319

ایئر انڈیا کو ایک دن میں دو ناخوشگوار واقعات کا سامنا کرنا پڑا

اس واقعے کے بعد یہ ہوائی جہاز بھی فوری معائنے کے لیے خالی کرا لیا گیا۔ ایئر انڈیا کی یہ پرواز بھی لندن جانا تھی۔ معائنے کے بعد 171 مسافر اور عملے کے ارکان ایک بار پھر اسی طیارے کے ذریعے لندن کے لیے روانہ ہو گئے۔

ایسوسی ایٹڈ پریس نے مزید لکھا ہے کہ ایک اور واقعے میں ایئر انڈیا ہی کے ایک مسافر طیارے کو، جو ممبئی سے مسافروں کو لے کر آیا تھا، امریکی ریاست ریاست نیو جرسی میں Newark کے ہوائی اڈے پر ایک ایسی وین نے ٹکر بھی مار دی، جو مسافروں کے لیے کیٹرنگ کا سامان لے کر وہاں پہنچی تھی۔