1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

معاشرہ

مافیا سے تعلق کے شبے میں 41 افراد گرفتار

اٹلی کے وزیر داخلہ روبیرٹو مارونی نے اُس بین الاقوامی کارروائی کو سراہا ہے، جس کے دوران جنوبی اطالوی علاقے کلابریا کے مافیا گروپ ’ندرانگیتا‘ کے 41 مشتبہ ارکان کو اٹلی، جرمنی، کینیڈا اور آسٹریلیا میں گرفتار کر لیاگیا۔

default

مافیا کارکن کی گرفتاری، فائل فوٹو

مارونی نے کہا کہ پولیس کی یہ کارروائی ’استثنائی طور پر اہم ہے کیونکہ اِس کے نتیجے میں ’ندرانگیتا‘ کے اٹلی کے اندر اور بیرون ملک مفادات کو سخت دھچکہ پہنچا ہے‘۔

حراست میں لیے گئے افراد میں سے ایک ٹونی والے لونگا ہے، جسے آسٹریلوی قصبے سٹرلنگ کے سابقہ میئر کے طور پر شناخت کیا گیا ہے۔ اِدھر جرمنی میں جن چھ مشتبہ مافیا ارکان کو گرفتار کیا گیا ہے، اُن میں ’ندرانگیتا‘ کا ایک مقامی لیڈر برونو نیسٹسی بھی شامل ہے۔ تفتیشی افسران کا کہنا ہے کہ 43 سالہ نیسٹسی فرینکفرٹ میں رہ رہا تھا اور اُس کا کام جرمنی میں اِس جرائم پیشہ تنظیم کی سرگرمیوں کو مربوط بنانا تھا۔ دیگر پانچ افراد کو جنوب مغربی جرمن شہر کونسٹانزے میں حراست میں لیا گیا۔

تفتیش میں مصروف پولیس افسران کے مطابق مختلف ممالک میں مشتبہ افراد کی گرفتاری سے یہ بات واضح ہو گئی ہے کہ ’ندرانگیتا‘ نے، جس کا ہیڈکوارٹر جنوبی اٹلی کے علاقے کلابریا میں ہے، گزشتہ برسوں کے دوران کیسے اپنی مجرمانہ سرگرمیوں کا دائرہ پھیلا دیا ہے۔

Flash-Galerie Italien Razzia Mafia

آٹھ مارچ کو جنوبی اٹلی میں مافیا کے لیے مبینہ طور پر کام کرنے والے گیووانی پرونیستی کی گرفتاری کا ایک منظر

منگل کو ہونے والی گرفتاریوں کے پیچھے کلابریا کے علاقے کے پولیس ڈیپارٹمنٹ کی تحقیقات کارفرما ہیں۔ اِس پولیس کے چیف پراسیکیوٹر جوزیپے پگناٹونے نے بتایا:’’بین الاقوامی سطح پر منشیات کی تجارت ہی کے حوالے سے نہیں بلکہ اپنا مافیا ڈھانچہ قائم کرنے کے حوالے سے بھی اس تنظیم کی سرگرمیاں بڑھتی جا رہی ہیں۔‘‘

پرائیویٹ نشریاتی ادارے ریڈیو 24 کے ساتھ اپنے ایک انٹرویو میں پگناٹونے نے کہا:’’کلابریا میں اِس تنظیم کا جو بھی ڈھانچہ ہے، بیرونِ ملک اُس ڈھانچے کی ہو بہو نقل کی گئی ہے۔‘‘ پگناٹونے کے مطابق بیرونِ ملک موجود اِس تنظیم کے ارکان ہمیشہ کلابریا کی مرکزی تنظیم کے ساتھ رابطے میں رہتے ہیں اور وقتاً فوقتاً اِس اطالوی علاقے کا دورہ بھی کرتے ہیں تاکہ ہدایات وصول کر سکیں اور مل جُل کر آئندہ کی حکمتِ عملی ترتیب دے سکیں۔

’ندرانگیتا‘ بین الاقوامی سطح پر 2007ء میں شہ سُرخیوں میں آئی تھی، جب مغربی جرمن شہر ڈوئیزبرگ میں ایک ریستوران میں متحارب جرائم پیشہ گروہوں کے درمیان فائرنگ کے تبادلے کے نتیجے میں چھ اطالوی شہری مارے گئے تھے۔

رپورٹ: امجد علی

ادارت: شامل شمس

DW.COM

ویب لنکس