1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

فن و ثقافت

مادام تساؤ میوزیم اگلے سال سے سڈنی میں بھی

برطانوی دارالحکومت لندن کے مشہور زمانہ مومی عجائب گھر مادام تساؤ کی طرف سے آج جمعرات کو بتایا گیا کہ اگلے سال سے اسی میوزیم کی آسٹریلوی شہر سڈنی میں بھی ایک شاخ کھول دی جائے گی۔

default

جرمن چانسلر انگیلا میرکل کا لندن کے مادام تساؤ میں رکھا گیا مومی مجسمہ

سڈنی سے موصولہ رپورٹوں کے مطابق اس منفرد میوزیم کی مالک کمپنی کی طرف سے سڈنی میں یہ عجائب گھر شہر کے سڈنی ہاربر نامی اس بندرگاہی علاقے میں قائم کیا جائے گا، جو پہلے ہی سڈنی اوپیرا ہاؤس کی عمارت کی وجہ سے بہت مشہور ہے اور جہاں ہر سال لاکھوں کی تعداد میں ملکی اور غیر ملکی سیاح جاتے ہیں۔

Sachin Tendulkar

سچن تندولکر مادام تساؤ میوزیم میں اپنی مومی نقل کے ساتھ

فرانسیسی خبر ایجنسی اے ایف پی نے بتایا ہے کہ کمپنی کے بیانات کے مطابق سڈنی میں اس میوزیم کا افتتاح اگلے برس مئی میں ہو جائے گا اور ہالی وڈ کی مشہور اداکارہ نکول کڈمین اور سٹار اداکار ہیو جیک مین وہ ’پہلے آسٹریلین سٹارز‘ ہوں گے، جن کے مومی مجسمے سڈنی کے مادام تساؤ میوزیم میں رکھے جائیں گے۔

کہا گیا ہے کہ سڈنی میں Madame Tussauds کی شاخ اور وہاں رکھے جانے والے عالمی شہرت کی حامل شخصیات کے مومی مجسموں کی تیاری میں بھی انتہائی اعلیٰ معیار کا وہی فنکارانہ ہنر اور مہارت استعمال کیے جائیں گے، جو گزشتہ دو سو سال سے اس کمپمنی کا خاصا چلا آ رہا ہے۔

Heidi Klum in Wachs im Madame Tussauds Berlin

جرمن سپر ماڈل ہائیڈی کلُوم: اصلی بھی اور مومی بھی

اس عجائب گھر کی مالک کمپنی کے ایک بیان کے مطابق عہد حاضر کی جن مشہور شخصیات کے مجسمے اس میوزیم کی مختلف شاخوں کے لیے تیار کیے جاتے ہیں، اکثر ایسی شخصیات کو ماڈلز کے طور پر کمپنی کے ماہر مجسمہ سازوں کے ساتھ کافی وقت بھی گزارنا پڑتا ہے۔ اس سلسلے میں کئی بہت مشہورآسٹریلوی شخصیات کے ساتھ ہونے والی بات چیت اب تک کافی آگے بڑھ چکی ہے۔

سڈنی کے مادام تساؤ کے لیے جس پہلی آسٹریلوی شخصیت کا مومی مجسمہ تیار کیا جائے گا، وہ Home and Away نامی سوپ اوپیرا کے ہر دلعزیز اداکار Ray Meagher ہوں گے، جو سن 1988 سے اس بہت مقبول ٹیلی وژن سیریز میں Alf Stewart کا کردار ادا کر رہے ہیں۔

اس عجائب گھر میں متوقع طور پر سیاست اور کھیلوں کے شعبے کی کئی نمایاں شخصیات کے مجسمے بھی نمائش کے لیے رکھے جائیں گے۔

Flash-Galerie Claudia Schiffer

کلاؤڈیا شفر، اصلی اور نقلی ڈیوڈ کاپر فیلڈ کے درمیان

لندن کا مادام تساؤ میوزیم موم کے بنے اپنے فن پاروں کی وجہ سے عالمگیر شہرت رکھتا ہے اور وہاں نمائش کے لیے رکھے گئے سبھی مجسمے متعلقہ شخصیات کی ان کے اصلی قد کاٹھ کے مطابق لیکن ناقابل یقین حد تک مشابہت والی ہو بہو نقل ہوتے ہیں۔

اس میوزیم کی ایشیا میں ہانگ کانگ اور بنکاک، یورپ میں برلن اور ایمسٹرڈم اور امریکہ میں نیو یارک اور لاس ویگاس سمیت کئی شہروں میں قائم شاخیں پہلے ہی کام کر رہی ہیں، جن میں مئی سن 2012 سے آسٹریلوی شہر سڈنی بھی شامل ہو جائے گا۔

رپورٹ: مقبول ملک

ادارت: امتیاز احمد

DW.COM