1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

لیبیا کے نئے رہنما غیر منتخب اشرافیہ، ترہونی کا الزام

لیبیا میں جمعرات کو اپنی ذمہ داریوں سے سبکدوش ہونے والی عبوری حکومت کی اہم ترین شخصیت نے نئی ملکی قیادت کی مذمت کرتے ہوئے اسے غیر منتخب اشرافیہ کا نام دیا ہے۔

default

قومی عبوری کونسل کے صدر مصطفیٰ عبدالجلیل اور ان کے ساتھ علی ترہونی، بائیں طرف

یہ بہت سخت بیان لیبیا کے سابق عبوری سربراہ حکومت علی ترہونی نے دیا ہے جن کی سربراہی میں کام کرنے والی انتظامیہ کل جمعرات کو اپنی ذمہ داریوں سے فارغ ہو گئی تھی۔ معمر قذافی کے چار عشروں سے بھی زیادہ طویل دور حکومت کے بعد اس شمالی افریقی ملک میں جو نئے لیڈر اقتدار میں آئے ہیں، انہی میں سے علی ترہونی وہ سب سے نمایاں سیاستدان ہیں جنہوں نے قومی عبوری کونسل اور اس کی قیادت کو اس طرح تنقید کا نشانہ بنایا ہے۔

طرابلس سے ملنے والی رپورٹوں کے مطابق لیبیا میں ایک نئی کابینہ کی تشکیل کے چند ہی گھنٹے بعد علی ترہونی نے ایک پریس کانفرنس میں صحافیوں کو بتایا کہ نئی لیڈرشپ سرمائے، ہتھیاروں اور تعلقات عامہ کی بنیاد پر کام کر رہی ہے۔

NO FLASH Libyen Tripolis Übergangsrat Ali Tarhouni

لیبیا میں ایک نئی کابینہ کی تشکیل کے چند ہی گھنٹے بعد علی ترہونی نے ایک پریس کانفرنس کی

انہوں نے کہا کہ ملک کی یہ نئی قیادت لیبیا کے سارے عوام کی نمائندہ نہیں ہے۔ ترہونی نے خبردار کرتے ہوئے کہا، ’اس وقت لیبیا کے 90 فیصد باشندے سیاسی طور پر بے آواز ہیں۔‘

خبر ایجنسی روئٹرز نے طرابلس سے اپنے مراسلے میں لکھا ہے کہ لیبیا میں وزیر اعظم عبدالرحیم الکائب کی سربراہی میں قائم ہونے والی نئی عبوری حکومت کی تشکیل میں بھی قومی عبوری کونسل کو کافی اثر و رسوخ حاصل رہا۔ اس نئی عبوری حکومت کا اعلان منگل کے روز کیا گیا تھا۔ اس کی ذمہ داریوں میں سے سب سے اہم یہ ہے کہ اسے لیبیا میں ابتدائی تبدیلیاں لاتے ہوئے اس ملک کو عملی جمہوریت کے راستے پر لانا ہے۔

اس نئی حکومت کے بارے میں علی ترہونی نے کہا، ’جو چہرے ہم دیکھ رہے ہیں اور جو آوازیں ہم سن رہے ہیں، وہ آوازیں اشرافیہ اور قومی عبوری کونسل NTC کی آوازیں ہیں۔ ایسے غیر منتخب لوگوں کی آوازیں، جن میں وہ بھی شامل ہیں جن کی باہر سے نقد رقوم، ہتھیاروں اور پبلک ریلیشنز کے ذریعے مدد کی جا رہی ہے۔‘

Flash-Galerie Libyen 40 Jahre mit Muammar al Gaddafi 1990

معمر قذافی نے بیالیس برس لیبیا پر حکومت کی

علی ترہونی قذافی حکومت کی مخالف قومی عبوری کونسل کی طرف سے عبوری وزیر اعظم بنائے جانے سے پہلے کچھ عرصہ قبل تک لیبیا کے خزانے اور تیل کے وزیر بھی رہ چکے ہیں۔ انہوں نے طرابلس میں صحافیوں کو بتایا کہ اس وقت ضرورت اس بات کی ہے کہ لیبیا کے عوام کی اکثریت کی آواز بھی سنی جائے۔

کل جمعرات کے دن نئی کابینہ کی حلف برداری تک بہت مختصر عرصے کے لیے عبوری حکومتی سربراہ کے عہدے پر فائز ترہونی نے کہا کہ لیبیا میں اب ایک ایسی تحریک شروع کیے جانے کی ضرورت ہے، جو ملک میں جمہوری آئینی اہداف کے حصول کو یقینی بنانے میں مدد دے سکے۔ انہوں نے یہ بھی کہا کہ این ٹی سی ملک میں ہر طرف دندناتے مسلح ملیشیا گروہوں کو ختم کرنے میں بری طرح ناکام ہو چکی ہے۔

رپورٹ: عصمت جبیں

ادارت: مقبول ملک

DW.COM