1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

فن و ثقافت

لڑکیاں، کشمیری صوفی موسیقی کی محافظ

جب ٹین ایجر شبنم بشیر نے تین برس قبل کلاسیکی صوفی میوزک کا ریاض شروع کیا، تو اسے اپنے مسلم گھرانے کے مردوں سے چھپ کر گیت گانا پڑتے تھے۔ اس کا خاندان نہیں چاہتا تھا کہ وہ گیت گائے۔

بھارتی زیر انتظام کشمیر میں اب یہ 14 سالہ بچی اپنے استاد محمد یعقوب شیخ کی رہنمائی میں روایتی صوفی گیت گانے میں مصروف ہے۔ کسی دور میں صوفی گلوکاری کے ميدان میں بھی مردوں کی اجارہ داری تھی، جو اب شبنم بشیر اور اس جیسی لڑکیاں رفتہ رفتہ ختم کرتی دکھائی دیتی ہیں۔

دیگر لڑکیوں کے ہم راہ ریاض کرتی شبنم بشیر نے خبر رساں ادارے اے ایف پی سے بات چیت میں کہا، ’’مجھے اپنے والدین کو منانے میں دو ماہ لگ گئے تھے۔‘‘

اس بچی کا مزید کہنا ہے، ’’میرے والد نے بالآخر مجھے اس شرط پر اجازت دی کہ اس سے میری تعلیم متاثر نہیں ہو گی۔‘‘

مسلم اکثریتی کشمیر میں لاکھوں افراد صوفی ازم کے پیروکار ہیں۔ یہ اسلام کی ایک شاخ ہے، جس میں موسیقی اور رقص کے ذریعے روح کے سکون کو کھوجا جاتا ہے۔

اس موسیقی کے گیت پرانی کشمیری زبان اور فارسی میں اپنا آپ نچھاور کر دینے، عاجزی اور انکساری سے عبارت ہیں اور ان کی تاریخ پندھرویں صدی سے ملتی ہے، مگر وقت کے ساتھ ساتھ انوکھے انداز میں صرف مردوں کی روایت بن گئے اور اسی طرح نسل در نسل متنقل ہوتے صدیاں عبور کرتے چلے گئے۔

Indien Erdbeben (Reuters/D. Ismail)

کشمیری لڑکیاں اپنے علاقے کی روایات کے تحفظ کے لیے پرعزم ہیں

شبنم بشیر کے استاد محمد یعقوب شیخ اس معاملے میں اچھوتے ہیں۔ انہوں نے یہ فن اپنے نانا غلام محمد قالین باف سے سیکھا تھا، جو اپنے علاقے میں بہترین صوفی گلوکار کے بہ طور جانے جاتے تھے۔

سری نگر کے نواح میں بسنے والے شیخ کا کہنا ہے، ’’پہلے تو اساتذہ اس فن کو اپنی نواسوں کو بھی نہیں سونپتے تھے، کیوں کہ وہ بیٹیوں کے بیٹے تھے، کیوں کہ یہ فن صرف بیٹوں یا پوتوں کے لیے مخصوص سمجھا جاتا تھا۔‘‘

شیخ نے صوفی گلوکاری کا فن دیگر افراد کو سکھانے کا کام اس اچھوتے فن موسیقی کو تحفظ دینے کے لیے شروع کیا اور ان کے مطابق وہ پوری جاں فشانی سےاپنا کام کر رہے ہیں اور انہیں اس سلسلے میں بڑی کامیابیاں بھی ملی ہیں۔

ویڈیو دیکھیے 03:00

برلن میں صوفی محفل موسیقی اور نوروز کا جشن

Audios and videos on the topic