1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

لندن: پی آئی اے کی پرواز کی جنگی طیاروں کی حفاظت میں لینڈنگ

برطانوی پولیس کے مطابق پاکستان کی قومی فضائی کمپنی پی آئی اے کی ایک مسافر پرواز کو برطانوی جنگی طیاروں کے گھیرے میں لندن کے اسٹین سٹیڈ ہوائی اڈے پر اتار لیا گیا۔ یہ طیارہ لاہور سے لندن کے ہیتھرو ایئر پورٹ جا رہا تھا۔

Pakistan International Airlines (picture-alliance/dpa)

اس مسافر طیارے نے اپنا سفر لاہور سے شروع کیا تھا

برطانوی دارالحکومت لندن سے منگل سات فروری کی شام ملنے والی نیوز ایجنسی روئٹرز کی رپورٹوں کے مطابق پولیس نے بتایا کہ اس پاکستانی مسافر طیارے کو شمال مشرقی لندن میں اسٹین سٹیڈ کے ہوائی اڈے پر اتارنے اور اس کے لیے برطانوی جنگی جیٹ فضا میں بھیجنے کی وجہ یہ اطلاعات بنیں کہ اس ہوائی جہاز میں سوار ایک مسافر بدنظمی پیدا کر رہا تھا۔

بکرے کی قربانی ’مذاق‘ بن گئی

چیئرمین پی آئی اے مستعفی

پاکستان طیارہ حادثہ: تمام مسافر ہلاک، لاشیں ناقابل شناخت

انگلش کاؤنٹی ایسیکس کی پولیس کے ایک ترجمان نے تاہم یہ بھی کہا کہ بظاہر یہ کوئی ہائی جیکنگ کا واقعہ یا دہشت گردی کے معاملے جیسی صورت حال نہیں ہے لیکن پھر بھی مقامی وقت کے مطابق منگل کی شام تک یہ پاکستان ہوائی جہاز اسٹین سٹیڈ ایئر پورٹ پر ہی کھڑا تھا اور حکام چھان بین کر رہے تھے۔

قبل ازیں منگل کی شام ہی برطانوی وزارت دفاع نے بھی یہ اعلان کیا تھا کہ برٹش ایئر فورس کے ٹائیفون جنگی طیاروں نے ایک مسافر ہوائی جہاز کو، جو لندن میں ہیتھرو ایئر پورٹ کی طرف پرواز پر تھا، فضا میں راستہ بدلنے پر مجبور کرتے ہوئے اپنی حفاظت میں لندن ہی کے اسٹین سٹیڈ ایئر پورٹ پر اتار لیا ہے۔

Pakistanisches Passagierflugzeug wird von britischen Kampfjets nach London eskortiert (Reuters)

ہیتھرو جانے والی اس پرواز کو لندن ہی کے اسٹین سٹیڈ ایئر پورٹ پر اتارا گیا

روئٹرز نے پی آئی اے کے ایک ترجمان کا حوالہ دیتے ہوئے لکھا ہے کہ حکام کو کسی نامعلوم شخص نے ایک فون کال کی تھی، جس کے بعد معمول کا طریقہء کار اختیار کرتے ہوئے کنٹرول ٹاور کے ذریعے اس پرواز کا رخ بدل دیا گیا۔ ترجمان نے یہ بھی کہا کہ سکیورٹی کلیئرنس کے لیے کارروائی جاری ہے اور طیارے میں سوار تمام مسافر اور عملے کے ارکان خیریت سے ہیں۔

فلائٹ ٹریکنگ ویب سائٹس کے مطابق پی آئی اے کی یہ پرواز PK757 پاکستانی شہر لاہور کے علامہ اقبال ایئر پورٹ سے لندن کے ہیتھرو ایئر پورٹ کے لیے روانہ ہوئی تھی۔

DW.COM