1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

فیفا ورلڈ کپ: سپین اور چلی کی چل گئی

جنوبی افریقہ میں جاری فیفا ورلڈ کپ ٹورنامنٹ میں پیر کے روز گروپ ایچ میں کھیلے گئے میچوں میں سپین نے ہونڈوراس کو دو صفر جبکہ چلی نے سوئٹزرلینڈ کو ایک صفر سے شکست دے دی۔

default

سپین کے ڈیوڈ ولا گول کرتے ہوئے

فیفا ورلڈ کپ میں منگل کو گروپ ’اے‘ میں میکسیکو کا مقابلہ یوروگوائے سے جبکہ فرانس کا مقابلہ میزبان ٹیم جنوبی افریقہ سے ہوگا۔ گروپ ’بی‘ میں کوریا رپبلک اور نائجیریا کی ٹیمیں آمنے سامنے ہوں گی جبکہ یونان اور ارجنٹائن کی ٹیمیں بھی مد مقابل ہوں گی۔

چلی نے مسلسل دوسری کامیابی حاصل کرنے کے بعد پوائنٹس ٹیبل میں پہلی پوزیشن برقرار رکھی ہے۔ اس کے کل چھ پوائنٹس ہیں۔ گروپ ایچ میں دوسرے نمبر پر سپین کی ٹیم ہے، جس نے ایک میچ ہارا جبکہ ایک جیتا ہے۔ اس طرح سپین کے تین پوائنٹس ہیں۔ اس گروپ میں تیسرے نمبر پر سوئٹزرلینڈ ہے، اگرچہ اس کے بھی تین پوائنٹس ہیں تاہم گول اوسط کی بنیاد پر سپین اس سے برتری حاصل کئے ہوئے ہے۔ ہونڈوراس نے ابھی تک کوئی بھی میچ نہیں جیتا اور وہ اس گروپ میں آخری یعنی چوتھے نمبر پر ہے۔

جوہانسبرگ میں سپین اور ہونڈوراس کے مابین کھیلے گئے میچ میں سپین کی طرف سے دونوں گول ڈیوڈ ولا نے کئے۔ ولا نے پہلا گول 17ویں جبکہ دوسرا51 ویں منٹ میں کیا۔ پہلے میچ میں شکست کے بعد سپین کی ٹیم کو تنقید کا نشانہ بنایا جا رہا تھا۔ اگرچہ اس میچ میں، بالخصوص دوسرے ہاف میں، ہسپانوی ٹیم کوئی متاثر کن کھیل پیش نہ کر سکی تاہم انیسویں عالمی کپ ٹورنامنٹ میں اس کی پہلی جیت نے ٹیم کی کمزوریوں کو بہت حد تک چھپا دیا ہے۔

Fußball WM 2010 - Chile gegen Schweiz

چلی کے مارک گونزیلا گول کے بعد خوشی مناتے ہوئے

پیر کو سوئٹزرلینڈ اور چلی کے مابین ایک دلچسپ مقابلہ ہوا۔ پورٹ ایلزبتھ کے مقام پر نیلسن منڈیلا سٹیڈیم میں کھیلے گئے اس میچ میں چلی نے ایک صفر سے مقابلہ اپنے نام کر لیا۔ میچ کا واحد گول متبادل کھلاڑی مارک گونزیلز نے کھیل کے75ویں منٹ میں کیا۔ اس میچ میں پیلے کارڈوں کی بھرمار ہوئی۔ چلی کے چھ کھلاڑی جبکہ سوئٹزرلینڈ کے تین کھلاڑیوں کو فاؤل کے باعث پیلے کارڈ دکھائے گئے جبکہ سوئس کھلاڑی والون بہرامی کو 30 ویں منٹ میں ریڈ کارڈ دکھایا گیا۔

اب اس گروپ میں سوئٹزرلینڈ اپنا تیسرا اورآخری میچ ہونڈوراس کے خلاف کھیلے گا۔ اس میچ میں سوئٹزرلینڈ کا پلڑا بھاری نظر آ رہا ہے۔ سپین کو ناک آؤٹ مرحلے تک رسائی حاصل کرنے کے لئے اب بہرحال اپنے آخری گروپ میچ میں اچھی گول اوسط کے ساتھ چلی کو شکست دینا ہو گی۔

رپورٹ: عاطف بلوچ

ادارت: گوہر نذیر گیلانی

DW.COM