1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

فیفا ورلڈ کپ: تیسری پوزیشن کے لئےجرمنی اور یوروگوائے مدمقابل

جنوبی افریقہ میں جاری انیسویں عالمی فٹ بال کپ میں آج جرمنی اور یوروگوائے تیسری پوزیشن کے لئے مد مقابل ہوں گے۔

default

جرمن فٹ بال ٹیم کے کوچ یوآخم لوو

ایک ہفتہ قبل شائد جرمن فٹ بال ٹیم کے کوچ یوآخم لوو کے گمان میں بھی نہ تھا کہ اُن کی ٹیم فیفا ورلڈ کپ میں تیسری پوزیشن حاصل کرنے کے لئے کوئی میچ کھیلے گی۔

آج کا میچ جرمن ٹیم کی صلاحیتوں کا ایک امتحان قرار دیا جا رہا ہے۔ ماہرین کا کہنا ہے کہ اس میچ سے صحیح اندازہ ہو سکے گا کہ زیادہ تر ناتجربہ کار کھلاڑیوں پر مشتمل جرمن ٹیم مستقبل میں کس سمت گامزن ہو گی۔

Philipp Lahm

جرمن فٹ بال ٹیم کے کپتان فلپ لاہم

جمعہ کو پریکٹیس سیشن میں کپتان فلپ لاہم، سٹرائیکر لوکاس پوڈولسکی اور کوچ یوآخم لوو نے شرکت نہیں کی۔ اطلاعات کے مطابق یہ فلو کی وجہ سے اپنے اپنے بستروں میں ہی رہے۔ یوآخم کی عدم موجودگی میں اسِسٹنٹ کوچ ہانسی فلِک نے کھلاڑیوں کو پریکٹس کروائی۔

یوروگوائے کے خلاف آج کھیلے جانے والے میچ میں لاہم اور پوڈولسکی کی شرکت تو مشکوک ہے ہی لیکن فلِک نے تھکے ہوئے مڈ فیلڈرزسمی خودیرا اور محسوت اوِزل کے بارے میں بھی شک کا اظہار کیا کہ شائد وہ بھی اس میچ میں شریک نہ ہوں سکیں۔

ان خبروں کے دوران جرمن فٹ بال ٹیم کے مینیجر الیوربئیرہوف نے کہا ہے کہ ممکنہ وچر پر اہم کھلاڑیوں کی عدم موجودگی کے باوجود وہ پر عزم ہیں کہ ان کی ٹیم یوروگوائے کے خلاف فتح حاصل کرنے کی بھرپور کوشش کرے گی،’’ ہماری توجہ اس امر پر مرکوز ہے کہ ہم نے یہ میچ سنجیدہ طریقے سے کھیلنا ہے۔‘‘ سپین کے خلاف نہ کھیل سکنے والے جرمن کھلاڑی تھوماس مُلر نے کہا کہ وہ اس میچ میں غیر سنجیدہ رویہ ہر گز اختیار نہیں کر سکتے۔

Flash-Galerie Klose WM 2010 Argentinien gegen Deutschland

کلوزے اس میچ میں ایک گول کر کے عالمی کپ مقابلوں میں سب سے زیادہ گول کرنے کا عالمی ریکارڈ برابر کر سکتے ہیں

جرمن ٹیم کے ایک اور اہم کھلاڑی میروسلاو کلوزے بھی گزشتہ کچھ دنوں سے کمر کی تکلیف میں مبتلا ہیں تاہم ان کے پاس موقع ہے کہ وہ عالمی کپ مقابلوں میں ایک مزید گول اسکور کر کے ایسے کھلاڑیوں میں شامل ہو جائیں، جنہوں نے ان مقابلوں میں اب تک سب سے زیادہ انفرادی گول اسکور کر رکھے ہیں۔ اب تک صرف برازیل کے رونالڈو کو ہی یہ اعزاز حاصل ہے کہ انہوں نے چودہ گول کئے ہوئے ہیں جبکہ کلوزے کے انفرادی گولوں کی تعداد 13 ہے۔

رپورٹ: عاطف بلوچ

ادارت: کشور مصطفٰی

DW.COM