1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

فٹ بال ورلڈ کپ: جرمن ٹیم کا میچ آج اتوار کو

جنوبی افریقہ میں جاری فٹ بال ورلڈ کپ میں ہفتہ کے روز ارجنٹائن اور جنوبی کوریا کی ٹیموں نے اپنے اپنے میچ جیت لئے۔ جرمن فٹ بال ٹیم آج گروپ ڈی کا اہم میچ آسٹریلوی ٹیم کے خلاف کھیلے گی۔

default

فیفا فٹ بال ورلڈ کپ میں گزشتہ روز تین میچ کھیلے گئے اور تین میں سے دو میں فیصلہ کن نتیجہ سامنے آیا۔ گروپ اے اور گروپ بی کے تمام میچ مکمل ہو گئے ہیں۔ گروپ بی میں ارجنٹائن اور جنوبی کوریا کے تین تین پوائنٹس ہیں۔ گروپ سی میں انگلینڈ کی ٹیم تین پوانٹس حاصل کرنے میں ناکام رہی۔ گروپ بی میں جنوبی کوریا کی ٹیم زیادہ گول کرنے کی وجہ سے گروپ لیڈر ہے اور ارجنٹائن کی پوزیشن دوسری ہے۔

ارجنٹائن بمقابلہ نائیجیریا

افریقی ملک نائیجیریا کی ٹیم کو سپر ایگل کے نام سے بھی پکارا جاتا ہے۔ ورلڈ کپ میں ارجنٹائن نے بطور فیورٹ ٹیم کے آغاز عمدہ طریقے سے کیا اور اپنا پہلا میچ جیت کر تین پوائنٹ حاصل کر لئے ہیں۔ میچ کے دوران ارجنٹائن کی ٹیم نے گول کرنے کے بہت سارے مواقع ضائع بھی کئے لیکن میچ پر مسلسل ان کی گرفت قائم رہی۔ اس میچ میں عالمی شہرت کے فارورڈ لیونل میسی کا کھیل دیکھنے کے لائق تھا اور ان کے شاندر کھیل کے جواب میں نائیجیریا کی ٹیم کے مشہور گول کیپر Vincent Enyeama - Chidi Odiah کی مہارت شاندار تھی۔ یہ ایک زور دار میچ تھا، جس میں ارجنٹائن کی ٹیم کا کھیل شاندار رہا۔ ارجنٹائن کی جانب سے اکلوتا گول گبریل ہائنزے نے میچ کے چھٹے منٹ میں کر دیا تھا۔ یہ میچ جوہانس برگ کے ایلیز پارک میں کھیلا گیا تھا۔

Argentinien - Nigeria Fußball WM Weltmeisterschaft Flash-Galerie

نائجیریا کے خلاف لیونل میسی کا جارحانہ انداز

جنوبی کوریا بمقابلہ یونان

جنوبی افریقہ کے ساحلی شہر پورٹ الزبتھ میں جنوبی کوریا کا مییچ یورپی ملک یونان سے تھا۔ کوالیفائنگ مرحلے میں جنوبی کوریائی ٹیم ناقابلِ شکست تھی اور اس ورلڈ کپ کی ابتدا بھی اُس نے جیت سے کی ہے۔ گروپ بی کے اس میچ میں جنوبی کوریائی ٹیم نے یورپی ٹیم کو دو گولوں کے فرق سے ہرا دیا۔ یہ گول کوریائی کھلاڑیوں لی ژونگ سُو اور پارک ژی سونگ نے کئے۔ سارے میچ میں یونانی ٹیم کے کھلاڑی آؤٹ آف فارم دکھائی دے رہے تھے۔ ماہرین کا خیال ہے کہ اگر یونانی ٹیم کا یہی کھیل جاری رہا تو وہ گروپ مرحلے ہی میں ٹورنامنٹ سے باہر ہو سکتی ہے۔

Südkorea - Griechenland Fußball WM Weltmeisterschaft

یونان اور جنوبی کوریا کے درمیان میچ کا منظر

انگلینڈ بمقابلہ ریاست ہائے متحدہ امریکہ

گروپ سی کا پہلا میچ انگلینڈ اور امریکی ٹیم کے درمیان تھا۔ ماہرین کا خیال تھا کہ انگلش ٹیم ایک بڑے فرق سے میچ میں کامیابی حاصل کرے گی لیکن ایسا نہ ہوا۔ میچ ایک ایک گول کے ساتھ برابری پر ختم ہوا۔ میچ کے چوتھے منٹ میں انگریز ٹیم کے کپتان سٹیون جیرارڈ نے گول کر کے ٹیم کو برتری دلا دی۔ امریکہ کے کلنٹ ڈیمپسی نے چالیسویں منٹ میں گول کر کے میچ برابر کر دیا۔ بعد میں انگلش ٹیم کے حملوں کو امریکی ٹیم کے گول کیپر نے ناکام بنا دیا۔ یہ میچ روسٹن برگ کے رائل بافوکینگ سٹیڈیم پر کھیلا گیا، جو رواں ورلڈ کپ کا سب سے چھوٹا سٹیڈیم ہے۔

اتوار کے میچ

آج اتوار کو بھی تین میچ کھیلے جا رہے ہیں۔ پہلا میچ الجزائر اور سلووینیا کی ٹیموں کے درمیان ہو گا۔ یہ گروپ سی کا میچ ہے۔ گروپ ڈی میں افریقی ملک گھانا کی ٹیم کو سیربیا کی ٹیم کا سامنا ہے اور تیسرے میچ میں سابق عالمی چیمپیئن جرمنی کے مدمقابل آسٹریلیا کی ٹیم ہے۔ بعض مبصرین کے مطابق جرمن ٹیم مخالف ٹیم کے مقابلے میں زیادہ متوازن  ہے لیکن جرمن ٹیم کے کوچ ژوآخم لوئیو کا کہنا ہے کہ آسٹریلوی ٹیم ایک خطرناک ٹیم ہے، جو کسی بھی ٹیم کے دفاع کو درہم برہم کر سکتی ہے۔

رپورٹ:  عابد حسین

ادارت:  امجد علی

DW.COM