1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

فوکوشیما پلانٹ: خالی کرائے گئے علاقے سے باہر ’تابکاری میں کمی‘

بین الاقوامی جوہری توانائی ایجنسی IAEA کے مطابق جاپان میں زلزلے اور سونامی سے شدید متاثر ہونے والے فوکوشیما جوہری پلانٹ کے آس پاس خالی کرائے گئے 20 کلومیٹر کے علاقے سے باہر تابکاری میں روزانہ بنیادوں پر کمی ہو رہی ہے۔

default

IAEA کے مطابق فوکوشیما جوہری پلانٹ کے قریب واقع علاقوں میں تابکاری میں کمی کا رجحان ریکارڈ کیا گیا ہے۔ دو روز قبل اس عالمی ادارے نے جاپان سے اپیل کی تھی کہ وہ اس پلانٹ کے اردگرد 40 کلومیٹر کے علاقے کو خالی کرائے۔ جاپانی حکومت نے فوکوشیما پلانٹ کے 20 کلومیٹر رداس کے علاقے کو Exclusion Zone جبکہ مزید 10 کلومیٹر کے علاقے کوStay Indoors Zone قرار دے رکھا ہے۔

Japan Erdbeben Tsunami Atomreaktor

فوکوشیما کا تباہ ہونے والے ایک ری ایکٹر کی عمارت

جمعہ کے روز بین الاقوامی جوہری توانائی ایجنسی کی طرف سے جاری کردہ بیان میں کہا گیا ہے کہ پلانٹ سے 20 کلومیٹر رداس کے باہر واقع علاقوں سے لیے گئے مزید نمونوں سے یہ بات واضح ہو گئی ہے کہ ان علاقوں میں تابکاری کے حوالے سے ’مسلسل بہتری‘ ہو رہی ہے۔

ایجنسی کی سربراہ برائے حادثات اور ایمرجنسی مرکز ایلینا بگلووا نے ویانا میں صحافیوں کو بتایا، ’نئے تجزیے سے ظاہر ہوتا ہے کہ خالی کرائے گئے علاقے سے باہر واقع دیہات میں تابکاری کی سطح اس حد سے کم ہے، جو کسی علاقے کو خالی کرانے کے لیے متعین ہے۔‘

ایلینا بگلووا کا کہنا ہے، ’ایک گاؤں کی مٹی کے 19 سے 29 مارچ کے درمیان لیے گئے نمونوں سے یہ بات سامنے آئی ہے کہ پہلی پیمائش کے بعد سے اب تک اس علاقے میں تابکاری کے حوالے سے خاصی بہتری آئی ہے۔‘

بین الاقوامی جوہری توانائی ایجنسی کے مطابق خالی کرائے گئے علاقوں کے باہر تابکاری میں گزشتہ دو روز سے مسلسل کمی دیکھنے میں آ رہی ہے۔

جاپان کے شمال مشرقی علاقے میں گزشتہ ماہ آنے والے بدترین زلزلے اور پھر سونامی لہروں کے باعث فوکوشیما کا جوہری بجلی گھر شدید متاثر ہوا تھا اور اس کے چار ری ایکٹرز کا کولنگ سسٹم مفلوج ہو گیا تھا، جس کے بعد سے اب تک جاپانی ماہرین ان ری ایکٹروں کو سنگین میلٹ ڈاؤن سے بچانے لیے ان کی فیول راڈز کو ٹھنڈا کرنے کی کوششوں میں مصروف ہیں۔

رپورٹ: عاطف توقیر

ادارت: مقبول ملک

DW.COM

ویب لنکس