1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

فرانسیسی کار ساز گروپ اوپل کو جنرل موٹرز سے خرید لے گا

فرانسیسی کار ساز گروپ پی ایس اے اور امریکی کمپنی جنرل موٹرز کے مابین اوپل کی خریداری سے متعلق حتمی اتفاق رائے ہو گیا ہے۔ مجموعی طور پر اربوں یورو کی اس ڈیل کا اعلان پیرس میں ان دونوں اداروں نے مشترکہ طور پر کیا۔

امریکا میں نیو یارک اور فرانس میں پیرس سے پیر چھ مارچ کو موصولہ نیوز ایجنسی اے ایف پی کی رپورٹوں کے مطابق فرانسیسی دارالحکومت میں موٹر کاریں بنانے والے ملکی صنعتی گروپ پی ایس اے اور امریکا کی جنرل موٹرز کی طرف سے اعلان کیا گیا کہ یہ فرانسیسی کمپنی اب اوپل اور واکس ہال کو ایک اعشاریہ تین بلین یورو کے عوض خرید لے گی۔

امریکی کمپنی جنرل موٹرز کا یورپ میں صنعتی پیداواری کاروبار دو بڑے کار ساز اداروں اوپل اور واکس ہال پر مشتمل ہے۔ پی ایس اے پہلے ہی پےجو، سِٹروئن اور ڈی ایس نامی فرانسیسی کار ساز کمپنیوں کا مالک ادارہ ہے۔

اوپل اور واکس ہال کو خرید لینے کے بعد یہ گروپ مجموعی طور پر پانچ مختلف یورپی کار ساز اداروں کا مالک بن جائے گا۔ اس طرح PSA کو مستقبل میں جرمنی کے فوکس ویگن گروپ کے بعد یورپ کے دوسرے سب سے بڑے کار ساز ادارے کی حیثیت حاصل ہو جائے گی۔

جنرل موٹرز اور پی ایس اے کے مابین یہ بھی طے پا گیا ہے کہ فرانسیسی آٹوموبائل گروپ پی ایس اے یورپ میں جنرل موٹرز کے ایک ذیلی مالیاتی ادارے ’جی ایم فنانسنگ‘ کو بھی صفر اعشاریہ نو بلین یورو کے عرض خرید لے گا۔ اس طرح مجموعی طور پر جنرل موٹرز کو دیے جانے والے 2.2 بلین یورو کے عوض یورپ میں اوپل اور واکس ہال کے تمام اثاثے اور صنعتی پیداواری شعبے پی ایس اے کی ملکیت میں آ جائیں گے۔

Frankreich PK PSA, General Motors und Opel (Reuters/C. Hartmann )

اس ڈیل کا اعلان پیرس میں پی ایس اے، جنرل موٹرز اور اوپل کے اعلیٰ ترین عہدیداروں نے مشترکہ طور پر کیا

اس ڈیل کے تحت اب تک جنرل موٹرز کی ملکیت اوپل اور واکس ہال کے جو پیداواری یونٹ اور ملازمین اب پی ایس اے کی عمل داری میں آ جائیں گے، ان میں اوپل اور واکس ہال موٹر گاڑیاں تیار کرنے والے چھ یورپی کارخانے، ان گاڑیوں کے پرزے تیار کرنے والے پانچ پروڈکشن یونٹ اور مجموعی طور پر قریب 40 ہزار ملازمین بھی شامل ہیں۔

جنرل موٹرز نے کہا ہے کہ یورپ میں اس کا جو کاروبار (اوپل اور واکس ہال) ایک عرصے سے خسارے میں جا رہا تھا، اس کی فروخت کے معاہدے کے ساتھ ساتھ اسی امریکی کمپنی کو اوپل اور واکس ہال کے اب تک کے ملازمین کو یکبارگی لیکن اپنی طرف سے کُل 4.5 بلین امریکی ڈالر پینشن کی مد میں بھی ادا کرنا پڑیں گے۔ یہ بات جنرل موٹرز کی طرف سے اس کمپنی میں سرمایہ کاری کرنے والے اداروں کو پیر کے روز باقاعدہ طور پر بتائی گئی۔