1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

اہم عالمی خبریں | 22.01.2018 | 08:25

عفرین میں ترک فوج کے خلاف کرد ملیشیا کی کامیابی کا دعویٰ

شام کے حالات پر نگاہ رکھنے والے مبصر گروپ سیریئن آبزرویٹری فار ہیومن رائٹس نے تصدیق کی ہے کہ کُرد جنگجُوؤں نے ترک فوج کے قبضے سے کچھ چوکیوں کو واپس اپنے کنٹرول میں لے لیا ہے۔ آبزرویٹری کے مطابق ترک فوج کے حملوں میں اب تک اکیس افراد کی ہلاکت ہوئی ہے اور اِن میں چھ بچے بھی شامل ہیں۔ قبل ازیں شامی کردوں کی جانب سے دعویٰ کیا گیا تھا کہ عفرین میں بعض مقبوضہ چوکیوں سے ترک فوج کو پیچھے ہٹا دیا گیا ہے۔ کرد میڈیا سینٹر کے مطابق ایک خصوصی آپریشن کے دوران یہ کامیابی حاصل کی گئی اور اس دوران نصف درجن ترک فوجی بھی مارے گئے ہیں۔

امریکا عالمی تجارت کے لیے خطرہ ہے، چین

چین کی وزارت خارجہ نے کہا ہے کہ عالمی تجارت کے لیے امریکا ایک خطرہ ہے۔ چینی وزارت خارجہ کی یہ وضاحت امریکی صدر ٹرمپ کی انتظامیہ کے اُس بیان کے جواب میں ہے، جس میں کہا گیا تھا کہ سن 2001 میں ورلڈ ٹریڈ آرگنائزیشن میں چین کی شمولیت کی امریکی حمایت ایک غلطی تھی۔ امریکا کی جانب سے یہ بھی کہا گیا کہ عالمی تجارتی ادارے کی جانب سے چین کو بین الاقوامی مارکیٹ کے دائرے میں لانے کی ناکامی بھی امریکی غلطی کو ثابت کرتی ہے۔ چین کی وزارت خارجہ نے یہ بھی کہا کہ بیجنگ حکومت ورلڈ ٹریڈ آرگنائریشن کے ضوابط کا احترام کرتی ہے۔

جولیان آسانج ایک مسئلہ بن چکے ہیں، ایکواڈورین صدر

لاطینی امریکی ملک ایکواڈور کے نئے صدر لینن مورینو نے کہا ہے کہ لندن میں اُن کے سفارتخانے میں پناہ لیے ہوئے جولیان آسانج اب ایک مسئلہ بن گئے ہیں۔ انہوں نے یہ بھی کہا کہ اُن کی حکومت کو یہ مسئلہ ورثے میں ملا ہے اور جلد ہی اس کے حل کے لیے مثبت پیش رفت کا امکان ہے۔ صدر مورینو نے ان خیالات کا اظہار اپنے ملک کے ٹیلی وژن پر انٹرویو کے دوران دیا۔ خفیہ دستاویزات کو عام کرنے والی ویب سائٹ وکی لیکس کے بانی جولیان آسانج اپنی گرفتاری سے بچنے کے لیے لندن میں اِس لاطینی امریکی ملک کے سفارت خانے میں سن 2012 سے پناہ لیے ہوئے ہیں۔

سوشل ڈیموکریٹس وسیع تر مخلوط حکومت سازی کے لیے مذاکرات پر رضا مند ہو گئے

سوشل ڈیموکریٹک پارٹی نے جرمن چانسلر انگیلا میرکل کے قدامت پسند اتحاد کے ساتھ مل کر وسیع تر حکومت سازی کے لیے باقاعدہ مذاکرات شروع کرنے کی منظوری دے دی۔ اس پیشرفت کے نتیجے میں جرمنی میں حکومت سازی کی راہ ہموار ہو گئی ہے۔ اتوار کے دن جرمن شہر بون میں سوشل ڈیمویٹک پارٹی کے ایک اجلاس میں 362 ارکان نے وسیع تر مخلوط حکومت کے لیے مذاکرات شروع کرنے کے حق میں ووٹ دیا جب کہ 279 نے اس کی مخالفت کی۔ توقع ہے کہ اب جرمنی میں نئی حکومت قائم کرنے کی خاطر باقاعدہ مذاکرات آج بروز پیر سے شروع کر دیے جائیں گے۔

فلسطینی رہنما عباس کی یورپی یونین کی خارجہ امور کی سربراہ سے ملاقات

فلسطین کے وزیر خارجہ نے کہا ہے کہ صدر محمود عباس بائیس جنوری کو یورپی یونین کے حکام سے ملاقات میں فلسطینی تنازعے کے لیے واضح حمایت کرنے کی درخواست کریں گے۔ ریاض المالکی نے برسلز میں دیے گئے ایک انٹرویو میں کہا کہ محمود عباس یورپی یونین کی خارجہ امور کی سربراہ کے ساتھ بروز پیر ہونے والی ملاقات میں یونین سے درخواست کریں گے کہ وہ فلسطین کو بطور ریاست تسلیم کرے۔ امریکی صدر ڈونلڈ ٹرمپ کی جانب سے یروشلم کو اسرائیلی دارالحکومت تسلیم کرنے کے اعلان کے بعد سے فلسطینی قیادت امریکا سے سخت ناراضی کا اظہار کر رہی ہے۔ محمود عباس بارہا کہہ چکے ہیں کہ امریکا اسرائیل فلسطینی تنازعے کا جانبدار ثالث نہیں ہے۔

امریکی حکومت شٹ ڈاؤن، کانگریس کا نیا مذاکراتی عمل بھی ناکام

اتوار اکیس جنوری کو بھی اراکین کانگریس بجٹ منظور کرنے کی کوششوں میں ناکام رہے۔ اگر بجٹ کی منظوری کی رکاوٹیں دور ہو جاتیں تو آج پیر کی دوپہر میں ہونے والی ووٹنگ کے نتیجے میں امریکی حکومتی شٹ ڈاؤن ختم ہو سکتا تھا۔ بعض اراکین کے مطابق پیش رفت کے بجائے معاملات مزید الجھ گئے ہیں۔ ویک اینڈ کی وجہ سے حکومتی شٹ ڈاؤن کا اثر زیادہ محسوس نہیں کیا گیا لیکن اُس کے گہرے اثرات پیر سے سامنے آنا شروع ہو جائیں گے۔ امریکی حکومتی شٹ ڈاؤن کی وجہ سے لاکھوں وفاقی ملازمین کو رخصت پر بھیج دیا جائے گا۔ یوں یہ ملازمین آج سے نئے ہفتے کا آغاز بغیر تنخواہ کے گھر بیٹھ کر کریں گے۔

امریکی نائب صدر اسرائیل پہنچ گئے

امریکا کے نائب صدر مائیک پینس اردن کا دورہ مکمل کرنے کے بعد آج اسرائیل پہنچ گئے ہیں۔ اسرائیل میں قیام کے دوران وہ اعلیٰ اسرائیلی حکومتی رہنماؤں کے ساتھ ملاقاتوں میں مشرق وسطیٰ کی موجودہ صورت حال پر تبادلہ خیال کریں گے۔ وہ اسرائیلی پارلیمنٹ کنیسٹ سے بھی خطاب کریں گے۔ مشرق وسطیٰ کے موجودہ دورے میں اسرائیل پہنچنے سے قبل وہ مصر اور اردن بھی گئے تھے۔ ان ملکوں میں قیام کے دوران پینس نے مصری صدر عبدالفتاح السیسی اور اردنی شاہ عبداللہ ثانی کے ساتھ ملاقاتیں کی تھیں۔ گزشتہ برس اپنا منصب سنبھالنے کے بعد پینس پانچویں مرتبہ اسرائیل کا دورہ کر رہے ہیں۔

ایران کی بحری فوجی مشقیں شروع ہو گئیں

ایران کے سرکاری ٹیلی وژن کے مطابق ملکی بحریہ نے آبنائے ہُرمز میں اپنی سالانہ سمندری فوجی مشقوں کا آغاز کر دیا ہے۔ اس مرتبہ ان فوجی مشقوں میں ایرانی پاسدارانِ انقلاب کے دستے شامل نہیں ہیں۔ ایرانی ٹیلی وژن کے مطابق ان فوجی مشقوں میں ایرانی ایئرفورس کے علاوہ زمینی دستے بھی شریک ہوں گے۔ ایرانی بحریہ کے سربراہ ایڈمرل حبیب اللہ سیاری نے کہا ہے کہ ان فوجی مشقوں سے اقوام عالم پر ایرانی بحری قوت کا اظہار ہو سکے گا۔ عالمی تجارتی گزرگاہوں میں آبنائے ہرمز کو خاصی اسٹریٹیجک اہمیت حاصل ہے اور یہ آئل ٹینکروں کا تیسرا مصروف ترین راستہ ہے۔

جاپانی وزیراعظم کا ملکی دستور میں ترامیم کا پلان

جاپان کی پارلیمنٹ کے نئے سیشن کا افتتاح آج بروز پیر جاپانی وزیراعظم شینزو آبے نے کیا۔ اپنی افتتاحی تقریر میں انہوں نے مزید اقتصادی وعدوں کے ساتھ ساتھ مضبوط ملکی دفاع اور امن پسندانہ دستور میں ترامیم کرنے کا واضح عندیہ دیا۔ اس تناظر میں انہوں نے پارلیمنٹ میں کہا کہ وہ توقع کرتے ہیں کہ تمام سیاسی جماعتیں اپنی اپنی تجاویز پارلیمنٹ میں جمع کرائیں گی اور اُن کی روشنی میں ملکی ترقی کی منصوبہ بندی کے لیے پارلیمانی فورم پر مفصل بحث کی جائے گی۔ قدامت پسند رہنما شینزو آبے مسلسل چھ سالوں سے جاپان کی وزیراعظم چلے آ رہے ہیں۔

فلپائنی آتش فشاں نے راکھ اگلنا شروع کر دی

فلپائن کے آتش فشاں مایون نے راکھ اگلنا شروع کر دی ہے۔ اس آتش فشاں کی گڑگڑاہٹ بھی قرب و جوار میں واضح طور پر سنائی دے رہی ہے۔ حالیہ ایام میں اس کے دہانے سے لاوا بھی نکل چکا ہے۔ اتوار اکیس جنوری کو دو مرتبہ لاوے کو نکلتے دیکھا گیا۔ ایک مرتبہ لاوا پانچ سو میٹر تک بلند بھی ہوا۔ حکام نے مایون آتش فشاں کے ارد گرد کے آٹھ کلومیٹر علاقے کے لوگوں کو چوکس رہنے کی ہدایت کی ہے۔ ایسا امکان ظاہر کیا جا رہا ہے کہ یہ آتش فشاں اگلے دنوں میں پھٹ سکتا ہے۔ یہ آتش فشاں فلپائن کے صوبے البے میں واقع ہے۔

آڈیو سنیے 04:00
ویڈیو دیکھیے 02:34