1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

عراق میں جلاوطن ایرانی باشندوں کے کیمپ میں خونریز تصادم

عراقی دارالحکومت بغداد سے شمال کی طرف واقع جلاوطن ایرانی باشندوں کے لئے قائم کیمپ اشرف کے مکینوں کی عراقی سیکیورٹی دستوں کے ساتھ جھڑپوں میں کم ازکم چھ افراد ہلاک اور 500 کے قریب زخمی ہوگئے۔

default

خونریز تصادم میں ہلاک شدگان کے اہل خانہ

دو روز تک جاری رہنے والی ان جھڑپوں کا آغاز منگل کو اس وقت ہوا جب عراقی فوجیوں نے اس کیمپ پر پہلے سے پائی جانے والی کشیدگی کی بناء پر دھاوا بول دیا اور اس دوران 400 سے زائد افراد زخمی ہوگئے۔ عراقی پولیس کے ایک اعلیٰ عہدیدار کے بقول کیمپ اشرف میں ایرانی جلاوطن شہریوں اور عراقی دستوں کے مابین جھڑپیں اس وقت شروع ہوئیں جب عراقی پولیس نے اس کیمپ میں اپنی ایک چوکی قائم کی اور وہاں عراقی پرچم لہرایا۔

بعد ازاں بغداد میں ایک حکومتی ترجمان علی الدباغ نے خبر رساں ادارے AP کو بتایا کہ ان جھڑپوں میں چھ ایرانی باشندوں کی ہلاکت کی تحقیقات کی جارہی ہیں اور اس سلسلے میں کیمپ میں رہائش پزیر 35 افراد کو حراست میں بھی لے لیا گیا ہے۔

Irak Lager von Volksmudschahedin Camp Ashraf

عراقی سیکیورٹی دستوں کا کیمپ اشرف پر حملہ

ان افراد کی گرفتاریوں کے بعد ایران میں تہران حکومت کے مخالف کارکنوں کی تنظیم پیپلز مجاہدین نے، جس کے ارکان کیمپ اشرف میں مقیم ہیں، یہ خدشہ ظاہر کیا تھا کہ عراقی حکومت گرفتار شدہ مکینوں کو غالباﹰ تہران کے حوالے کردے گی۔ تاہم ایسے خدشات کی نفی کرتے ہوئے علی الدباغ نے کہا کہ بغداد کی طرف سے ان گرفتار شدگان میں سے کسی کو بھی زبردستی ملک بدر نہیں کیا جائے گا۔

امریکی وزیر خارجہ ہلیری کلنٹن نے کیمپ اشرف میں انسانی ہلاکتوں پر اپنے رد عمل میں کہا: "ہم اطراف سے تحمل کا مظاہرہ کرنےکے لئے کہہ رہے ہیں"۔ انہوں نے کہا کہ امریکہ کو اس حوالے سے تشویش تو ہے مگر یہ معاملہ عراقی حکومت کو ملکی قانون کے مطابق حل کرنا ہوگا۔

عراق میں 1986میں قائم کئے جانے والے اس کیمپ میں ایرانی اپوزیشن کی پیپلز مجاہدین نامی تنظیم کے قریب ساڑھے تین ہزار ارکان مقیم ہیں۔ یہ کیمپ صدام دور میں لڑی جانے والی ایران عراق جنگ میں بغداد کی عملی مدد کرنے والے ایرانی اپوزیشن کے عسکریت پسندوں کے لئے بنایا گیا تھا۔

رپورٹ: میرا جمال

ادارت: مقبول ملک

DW.COM