1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

معاشرہ

صدر اوباما ماحولیاتی آلودگی کے خلاف پرعزم

امریکی صدر باراک اوباما نے ملک میں موٹرسازی کے شعبے سے وابستہ صنعت کاروں کو ہدایات دی ہیں کہ وہ ایسی نئی کاریں تیار کریں، جن کے استعمال سے ماحولیاتی آلودگی کو ہر ممکن حد تک کم کیا جا سکے۔

default

باراک اوباما نے اپنی انتخابی مہم میں توانائی اور ماحولیاتی تبدیلی ایسے موضوعات کو خصوصی توجہ دی تھی

اوباما نے گذشتہ روز وائٹ ہاؤس میں منعقدہ ایک تقریب کے دوران صنعت کاروں پر ایسی موٹرگاڑیاں تیار کرنے کے لئے زور دیا، جو کم سے کم تیل یا گیس استعمال کرتے ہوئے زیادہ سے زیادہ فاصلہ طے کرنے کی صلاحیت رکھتی ہوں۔

صدر اوباما نے کہا کہ ان نئی موٹرگاڑیوں کو نئے قومی معیارات کے تحت پرکھا جائے گا، تاکہ امریکہ غیرملکی تیل پر اپنا انحصار کم کرسکے۔ تجزیہ نگاروں کے مطابق ان نئی کاروں کو بنانے سے اگلے پانچ سالوں میں سب سے زیادہ فائدہ موٹرسازی کی صنعت کو ہو گا، جس کو موجودہ عالمی معاشی بحران سے شدید اقتصادی نقصان ہوا ہے۔

Symbolbild Obama Capitol

انہوں نے ان نئے قومی معیارات کو امریکہ میں توانائی پر کم سے کم انحصار کر نے والے اقتصادی ڈھانچے کی ایک نئی تشکیل کی جانب پہلا قدم قرار دیا۔ صدر اوباما نے کہا کہ نئی کاریں اگر ان قومی معیارات کے مطابق تیار کی گئیں، تو امریکی ریاست کو 1.8 بلین بیرل تیل کی بچت ہوگی۔

امریکی صدر نے اپنے صدارتی انتخاب کے بعد ماحول کو آلودگی سے پاک کرنے کے عزم کا کافی مرتبہ اظہار کیا ہے۔ اسی لئے امریکی کانگریس کے اراکین اس قانون ساز ادارے میں ماحولیاتی آلودگی کے حوالے سے ایک بل پیش کرنے کی تیاری کر رہے ہیں۔ اس متوقع بل کی بدولت حکومتی اداروں کو ماحول میں سبز مکانی اثر کا باعث بننے والی ضرررساں گیسوں کے اخراج کو روکنے سے متعلق باقاعدہ اور جامع ہدایات بھی مہیا کی جائیں گی۔

Italien Verkehr

نئی موٹرگاڑیوں کو نئے قومی معیارات کے تحت پرکھا جائے گا

موٹرسازی کی صنعت کے ماہرین کے مطابق ماحول میں کم سے کم آلودگی پھیلانے والی گاڑیوں کا وزن کافی کم ہو گا۔ ہلکے وزن کی گاڑیوں کی تیاری کے اخراجات عام گاڑیوں کی نسبت کافی زیادہ ہوسکتے ہیں۔ اس کے نتیجے میں ان کے خریداروں پر کافی معاشی بوجھ پڑے گا اور انہیں ہر کار کی خریداری پر تقریبا 13 سو ڈالر زیادہ ادا کرنے ہوں گے۔

ان نئے معیارات کا اطلاق امریکہ کی ایجنسی برائے ماحولیاتی بچاؤ کرے گی، جس کا ہدف امریکہ میں ہر مسافربردار موٹرگاڑی اور ٹرک کو 2016ء تک 6.62 لٹر میں ایک سو کلومیٹر تک چلنے کی صلاحیت پر لانا ہے۔ امریکی ایجنسی برائے ماحولیاتی بچاؤ کو اس حوالے سے اپنے اقدامات کے لئے امریکی کانگریس سے منظوری کی ضرورت نہیں ہے۔ ایجنسی کے مطابق اسے ان معیارات کے مکمل اطلاق کے لئے انہیں تقریبا ایک سال کا عرصہ درکار ہوگا۔