1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

شکست خوردہ بھارتی ٹیم کی انگلینڈ میں مشکلات بڑھ گئیں

انگلینڈ کے دورے پر گئی ہوئی بھارتی ٹیم کئی طرح کی مشکلات میں گھر گئی ہے۔ سیریز کے پہلے دو ٹیسٹ میچوں میں ناکامی کا منہ دیکھنے کے بعد اب مہمان ٹیم کے کئی کھلاڑی زخمی ہوکر سیریز ادھوری چھوڑنے پر مجبور ہیں۔

default

بھارتی کرکٹ ٹیم کے تیز ترین بولر ظہیر خان کو ٹخنے میں تکلیف کے سبب انگلینڈ کے دورے سے واپس بھارت بلایا گیا ہے۔ بائیں ہاتھ سے گیند کرانے والے پرتاپ پٹیل ان کی جگہ لیں گے۔ بھارت اور انگلینڈ کی رواں سیریز میں دو ٹیسٹ میچز، ایک ٹوئنٹی ٹوئنٹی اور پانچ ایک روزہ مقابلے ہونا باقی ہیں۔ ظہیر خان ٹخنے کی تکلیف کے سبب ویسٹ انڈیز کا دورہ بھی نہیں کرسکے تھے۔

بھارتی کرکٹ بورڈ کے مطابق ظہیر خان کے ٹخنے کا آپریشن کیا جائے گا اور انہیں کم از کم چار ماہ تک آرام کرنے کا کہا گیا ہے۔ 34 سالہ ظہیر کو ایک روزہ مقابلے کی سیریز میں شامل کیا گیا تھا مگر اب ان کا نام ممکنہ کھلاڑیوں کی فہرست سے نکال لیا گیا ہے۔

Virender Sehwag Cricketspieler

وریندر سہواگ

ان کے متبادل آر پی سنگھ ستمبر 2009ء سے اب تک بھارت کے لیے کوئی بین الاقوامی میچ نہیں کھیل سکے ہیں۔ بھارتی ٹیم ظہیر سے قبل افتتاحی بلے باز وریندر سہواگ سے بھی محروم ہوچکی ہے، جو کندھوں کی تکلیف میں مبتلا ہیں۔ سہواگ کے ساتھی اوپنر گوتھم گھمبیر بھی زخمی ہیں۔ بھارتی ٹیم کی مشکلات یہیں تک محدود نہیں بلکہ آل راؤنڈر یوراج سنگھ اور اسپنر ہربھجن سنگھ بھی دوسرے ٹیسٹ میچ میں زخمی ہونے کے سبب سیریز کے دیگر مقابلوں سے باہر ہوچکے ہیں۔

بھارت اور انگلینڈ کے درمیان سیریز کا تیسرا ٹیسٹ میچ 11 اگست سے برمنگھم میں شروع ہوگا۔

رپورٹ: شادی خان سیف

ادارت: شامل شمس

DW.COM