1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

شمالی پاکستان میں شدید بارشیں، ہلاکتوں کی تعداد 55 ہو گئی

پاکستان کے شمالی علاقوں میں شدید بارشوں کے نتیجے میں ہلاک شدگان کی تعداد 55 ہو گئی ہے۔ ان بارشوں سے سب سے زیادہ متاثرہ علاقے صوبے خیبر پختونخوا کے ہیں، جب کہ پاکستان کے زیرانتظام کشمیر میں بھی متعدد افراد ہلاک ہوئے ہیں۔

خبر رساں ادارے روئٹرز کے مطابق امدادی ٹیمیں متاثرہ علاقوں میں امدادی کارروائیوں میں مصروف ہیں اور ان شدید بارشوں سے متاثرہ ہزاروں افراد تک ہنگامی امداد پہنچانے کی کوششیں کی جا رہی ہیں۔ تاہم متعدد مقامات پر مٹی کے تودے گرنے کی وجہ سے سڑکیں بند ہو گئی ہیں اور امدادی کارکنوں کو متاثرہ علاقوں تک پہنچنے میں مشکلات کا سامنا ہے۔

پاکستانی محکمہء موسمیات کے مطابق غیرمتوقع طور پر موسلا دھار بارشوں کا سلسلہ بدستور جاری ہے اور یہ بڑا سلسلہ اب رفتہ رفتہ شمال سے ملک کے شمال مشرقی علاقوں کی جانب بڑھ رہا ہے۔ تاہم محکمہء موسمیات کے مطابق ملک کے شمالی حصوں میں علیحدہ موسمیاتی نظاموں کے تحت مزید بارشیں متوقع ہیں۔

Peschawar Schwere Regenfälle in Pakistan

شدید بارشوں کا سلسلہ تاحال جاری ہے

خیبر پختونخوا صوبے کے ڈیزاسٹر مینیجمنٹ کے محکمے سے وابستہ یوسف ضیا کے مطابق شدید بارشوں اور مٹی کے تودے گرنے کے نتیجے میں قریب ڈیڑھ سو مکانات تباہ ہو گئے ہیں اور بے گھر ہونے والے افراد کو خیمے اور کمبل مہیا کیے جا رہے ہیں۔

یوسف ضیا نے بتایا کہ کوہستان کے علاقے میں لینڈ سلائیڈنگ کی وجہ سے 30 افراد ابھی تک وہاں پھنسے ہوئے ہیں، جنہیں بچانے کے لیے ہیلی کاپٹر روانہ کیے گئے ہیں۔

بتایا گیا ہے کہ خیبر پختونخوا میں اس قدرتی آفت کے نتیجے میں ہلاک شدگان کی تعداد 47 ہے جب کہ 37 افراد زخمی ہوئے ہیں۔ ان شدید بارشوں سے سب سے زیادہ وادی سوات متاثر ہوئی ہے۔ اس وادی کے مختلف علاقوں میں اتوار تین اپریل کے روز 121 ملی میٹر تک بارش ریکارڈ کی گئی۔

دریں اثناء پاکستان کے زیرانتظام کشمیر میں بھی شدید بارشوں کے نتیجے میں آٹھ افراد کی ہلاکت کی تصدیق ہو گئی ہے۔ مقامی حکام کے مطابق شدید بارشوں کی وجہ سے متعدد مقامات پر سڑکیں بند ہو گئی ہیں، جب کہ ذرائع مواصلات کو بھی نقصان پہنچا ہے۔