1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

شام: جنگ ملکی معیشت کے لیے ایک بڑی تباہی، بچے شدید متاثر

ایک نئے مطالعاتی جائزے میں بتایا گیا ہے کہ شام میں جاری جنگ نے وہاں کی معیشت پر کتنے تباہ کن اثرات مرتب کیے ہیں۔ اس جائزے کے مطابق اس جنگ کے معاشی اثرات نے سب سے زیادہ وہاں کے بچوں کو متاثر کیا ہے۔

Syrien Kinder in Homs

26 فروری 2016ء کی اس تصویر میں شامی بچے حمص شہر کے کھنڈرات میں سے ہوتے ہوئے گزر رہے ہیں

شام میں پندرہ مارچ 2011ء کو شروع ہونے والے احتجاجی مظاہرے اُس خانہ جنگی کا نقطہٴ آغاز ثابت ہوئے تھے، جس میں اب تک دو لاکھ ستر ہزار افراد ہلاک اور کئی ملین بے گھر ہو چکے ہیں۔

رواں ہفتے ایک مطالعاتی جائزے کے نتائج جاری کیے گئے ہیں، جس میں بتایا گیا ہے کہ پانچ برسوں سے جاری اس خونریز تنازعے میں پیداوار اور خدمات کے شعبے میں ہی ماہانہ ساڑھے چار ارب ڈالر کا نقصان ہو رہا ہے۔ اس جائزے کو ’دی کاسٹ آف کنفلکٹ فار چلڈرن‘ (تنازعے سے بچوں کو پہنچنے والے نقصانات) کا عنوان دیا گیا ہے اور اسے بچوں کی بہبود کے لیے سرگرم ایک مسیحی ادارے ’ورلڈ وژن انٹرنیشنل‘ نے مشاورتی ادارے ’فرنٹیئر اکنامکس‘ کے ساتھ مل کر تیار کیا ہے۔

معاشی بحالی کے لیے برسوں درکار ہوں گے

اس جائزے کے مطابق 2011ء سے لے کر اب تک شام کو 275 ارب ڈالر کا معاشی نقصان ہو چکا ہے اور اگر یہ جنگ 2020ء تک جاری رہی تو یہ نقصان بڑھ کر 1.3 ٹریلین ڈالر تک پہنچ جائے گا۔

اس رپورٹ میں کہا گیا ہے کہ اگر یہ تنازعہ اسی سال ختم بھی ہو جاتا ہے، تب بھی اس ملک کو 448 ارب اور 689 ارب ڈالر کے درمیان معاشی نقصان کا سامنا کرنا پڑے گا۔ مزید یہ کہ شام میں امن قائم ہو جانے کے بعد بھی کھنڈر ہو چکی معیشت اور اقتصادی ڈھانچے کی بحالی اور تعمیرِ نو کے لیے کئی برس درکار ہوں گے۔ ایک اندازے کے مطابق شام کو اپنی فی کس مجموعی آمدنی میں ہونے والی کمی کو پورا کرنے کے لیے دَس تا پندرہ سال کا عرصہ درکار ہو گا۔

Syrien Kinder in der Nähe von Aleppo

6 فروری 2016ء: حلب سے فرار ہونے والے شہری ترکی کی سرحد کے قریب ایک گزرگاہ عبور کرنے کی کوشش میں ہیں، ایک ڈری سہمی شامی بچی بھی ان میں شامل ہے

اس خانہ جنگی کی وجہ سے شام کے ہمسایہ ممالک بھی شدید متاثر ہوئے ہیں، جہاں شام چھوڑ کر فرار ہونے والے لاکھوں شہریوں نے پناہ لی ہے۔ اس مطالعاتی جائزے میں ان ممالک مثلاً لبنان، اردن ا ور ترکی کی معیشتوں کو پہنچنے والے نقصانات کو بھی دیکھا گیا ہے۔ لبنان کو سب سے زیادہ نقصان پہنچا ہے، جہاں کی فی کس مجموعی قومی پیداوار اُس سے 23 فیصد کم ہے، جتنی کہ شامی تنازعے کے نہ ہونے کی صورت میں ہو سکتی تھی۔

بچوں کے لیے تباہ کن اثرات

اس رپورٹ میں کہا گیا ہے کہ پورے خطّے میں کم از کم 8.2 ملین بچے اس خانہ جنگی سے متاثر ہوئے ہیں۔ ایک بڑی تعداد ایسے بچوں کی ہے، جن کے والدین یا گھر کے دیگر افراد اس جنگ میں موت کا شکار ہوئے ہیں۔ دیگر بچے ایسے ملکوں میں مہاجر بن کر پناہ لیے ہوئے ہیں، جہاں اُن کے والدین کو کام کرنے کی اجازت نہیں ہے اور یوں وہ اپنی تعلیم جاری نہیں رکھ پا رہے۔ یہ چیز لاکھوں شامی بچوں کے مستقبل پر شدید منفی اثرات مرتب کرے گی۔

اس رپورٹ میں بتایا گیا ہے کہ پناہ کی تلاش میں بھٹکنے والے شامی شہریوں کی ایک بڑی تعداد غربت کا شکار ہو چکی ہے اور زیادہ تر کنبوں میں لوگ اپنے بچوں کو بھی کام پر بھیجنے پر یا بچوں کی اوائل عمری ہی میں شادی کر دینے پر مجبور ہو چکے ہیں۔

Syrien Waffenruhe spielende Kinder

پانچ سال سے جاری خانہ جنگی کی وجہ سے لاکھوں شامی بچے اپنی تعلیم جاری نہیں رکھ پا رہے

اس رپورٹ میں جہاں شام میں خانہ جنگی کے فریقین سے جنگ بند کر دینے کی اپیل کی گئی ہے، وہیں ترکی، اردن اور لبنان پر بھی زور دیا گیا ہے کہ وہ شامی مہاجرین کے لیے اپنی سرحدیں بند نہ کریں، بچوں کو اپنی تعلیم جاری رکھنے کے مواقع فراہم کریں اور ایسے حالات پیدا کریں کہ ان بچوں کے بالغ لواحقین کہیں ملازمت کرتے ہوئے اپنا روزگار خود پیدا کر سکیں۔

DW.COM