1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

سویڈن: شیعہ مسلمانوں کی سب سے بڑی مسجد میں آتش زنی

سویڈش  پولیس حکام کا کہنا ہے کہ سٹاک ہولم میں شیعہ مسلمانوں کی سب سے بڑی مسجد پر گزشتہ رات ہوئے ایک مشتبہ حملے میں مسجد کو بڑے پیمانے پر نقصان پہنچا ہے۔ حکام کے مطابق مسجد کو جان بوجھ کر آگ لگائی گئی تھی۔

Schweden Brand in einer großen Moschee in der Nähe von Stockholm (Getty Images/AFP/TT News Agency/A. Wiklund)

سویڈن میں حالیہ برسوں میں کئی مساجد پر حملے کیے گئے ہیں اور چند ایک قصور واران کو گرفتار بھی کیا گیا ہے

ایک پولیس ترجمان کے مطابق شمالی سٹاک ہولم کے مضافات میں واقع ’یاکوبز برگ‘ کے قصبے میں قائم امام علی اسلامک سینٹر کا بیرونی حصہ شعلوں کی نذر ہو گیا ہے  تاہم  اس واقعے میں کسی فرد کے زخمی ہونے کی اطلاعات نہیں ملیں۔

 سویڈن کی ٹی ٹی نیوز ایجنسی نے پولیس ترجمان لارش بستروم کے حوالے سے بتایا:’’ایسا معلوم ہوتا ہے کہ مسجد کو آگ باہر سے لگائی گئی۔‘‘ رپورٹ کے مطابق اس بات کی بھی تحقیقات کی جا رہی ہیں کہ آیا حملے کے کوئی سیاسی محرکات تھے۔

 امام علی اسلامک سینٹر کے ترجمان عقیل زہری نے سویڈش براڈکاسٹر ادارے ایس وی ٹی کو بتایا:’’یہ سویڈن میں شیعہ مسلک سے تعلق رکھنے والے مسلمانوں کی سب سے بڑی مسجد ہے، جو یہاں ہزاروں کی تعداد میں آتے ہیں۔ یہ عقیدت مند مسجد پر حملے سے بہت پریشان ہیں۔‘‘

سویڈن میں حالیہ برسوں میں کئی مساجد پر حملے کیے گئے ہیں اور چند ایک قصور واران کو گرفتار بھی کیا گیا ہے۔ گزشتہ برس اپریل میں ایک 31 سالہ شخص کو سی سی ٹی وی کی فوٹیج کی مدد سے گرفتار کیا گیا تھا۔ اس شخص نے نسلی بنیادوں پر طیش میں آ کر جنوب مغربی شہر بورس کی ایک مسجد کو آگ لگا دی تھی اور اپنا جرم قبول کر لیا تھا۔ اسے تین سال قید کی سزا سنائی گئی تھی۔

گزشتہ برس نومبر میں نامعلوم افراد نے سویڈش دارالحکومت کی ایک مسجد میں داخل ہو کر اُس کے مرکزی ہال میں رنگین اسپرے سے نقش نگاری اور توڑ پھوڑ کی تھی۔ سویڈن میں نسل پرستی کی مخالفت کرنے والے سرگرم کارکنوں نے جنوری سن 2015 میں ملک میں مساجد جلانے کے تسلسل سے ہونے والے تین واقعات پر احتجاج کیا تھا۔

خیال رہے کہ گزشتہ ماہ کی سات تاریخ کو اُزبک قومیت کے حامل ایک ٹرک ڈرائیور رحمت عاقلوف  نے 5 افراد کو ایک چوری شدہ ٹرک تلے روند ڈالا تھا۔ تحقیقات پر اِس ٹرک ڈرائیور نے دہشت گردانہ حملہ کرنے کا اعتراف بھی کر لیا تھا۔

DW.COM

Audios and videos on the topic