1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

مہاجرین کا بحران

سوئس پولیس نے سری لنکا کے چاقو لہراتے مہاجر کو گولی مار دی

سوئٹزرلینڈ میں پولیس نے سری لنکا کے ایک تارک وطن پر دو دیگر مہاجرین کو اُس کے حملے سے بچانے کے لیے فائرنگ کی، جس کے نتیجے میں یہ سری لنکن مہاجر  ہلاک ہو گیا۔ یہ دونوں پناہ گزین اس وقت پولیس کی حفاظت میں تھے۔

سوئس پولیس حکام کا کہنا ہے کہ اس اڑتیس سالہ سری لنکن تارک وطن  نے سات اکتوبر بروز ہفتہ مقامی وقت کے مطابق رات دو بجے پولیس کی طرف سے حفاظت میں لیے گئے دو دیگر مہاجرین  پر ایک چاقو سے حملہ کرنے کی کوشش کی تھی۔ یہ واقعہ سوئٹزرلینڈ کے اطالوی زبان والے علاقے ٹیچینو میں پیش آیا۔

ایک بیان میں کہا گیا ہے کہ پولیس بریساگو کے علاقے میں جھیل ماجیئورے کے کنارے واقع ایک عمارت میں ایک جھگڑے کی اطلاع ملنے پر وہاں پہنچی تھی۔ پولیس اہلکار ابھی اس عمارت کے نچلے فلور پر ہی تھے کہ مارے جانے والے سری لنکن شہری نے دو دیگر مہاجرین پر حملے کی کوشش کی۔

پولیس رپورٹ کے مطابق اس دوران دونوں زیر حفاظت مہاجرین کو حملہ آور سے بچانے کے لیے وہاں موجود اہلکاروں میں سے ایک کو گولی چلانا پڑ گئی۔ بعد ازاں اس مہاجر کو فوری طبی امداد بھی بہم پہنچائی گئی لیکن وہ موقع پر ہی دم توڑ گیا۔ اس واقعے  میں مزید کوئی شخص زخمی نہیں ہوا۔ ٹیچینو پولیس کے مطابق اس جھگڑے کی وجوہات اور سری لنکن تارک وطن کی ہلاکت کی باقاعدہ تحقیقات شروع کر دی گئی ہیں۔

DW.COM