سنگاپور گراں پری، نیکو روز بیرگ آگے نکل گئے | کھیل | DW | 18.09.2016
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

سنگاپور گراں پری، نیکو روز بیرگ آگے نکل گئے

نیکو روزبیرگ نے فارمولان ون موٹر ریسنگ کا سنگا پور گراں پری ٹائٹل اپنے نام کر لیا ہے۔ اتوار کے روز اس دوڑ میں کامیابی کے ساتھ رواں سیزن میں انہوں نے پوائنٹس ٹیبل پر پہلے نمبر پر براجمان لوئیس ہیملٹن کو پیچھے چھوڑ دیا ہے۔

اٹھارہ ستمبر بروز اتوار پول پوزیشن سے ریس شروع کرنے والے مرسیڈیز ٹیم کے ڈرائیور نیکو روزبیرگ نے آج اتوار کے روز عمدہ کارکردگی کا مظاہرہ کرتے ہوئے رواں سیزن میں پوائنٹس ٹیبل پر پہلی پوزیشن حاصل کر لی ہے۔ اس کامیابی کے ساتھ ان کے مجموعی پوائنٹس کی تعداد دو سو تہتر ہو گئی ہے۔

سنگاپور گراں پری سے قبل مرسیڈیز ٹیم کے ہی ڈرائیور لوئیس ہیملٹن پوائنٹس ٹیبل پر پہلی پوزیشن پر براجمان تھے۔ تاہم اس ریس میں تیسرے نمبر پر آنے والے برطانوی ڈرائیور ہیملٹن کے پوائنٹس 265 ہو گئے ہیں۔

اس وقت امسالہ چیمپئن شپ کے مقابلے میں تیسرے نمبر پر ڈینیل ریکارڈو ہیں، جنہوں نے سنگار پور گراں پری میں دوسری پوزیشن حاصل کی ہے۔ چوتھے نمبر پر فیرارے ٹیم کے جرمن ڈرائیوار سباستیان فیٹل ہیں۔

روزبیرگ نے اپنے کیریئر میں پہلی مرتبہ سنگار پور گراں میں کامیابی حاصل کی ہے جب کہ اس سیزن میں یہ ان کی تیسری مسلسل جیت ہے۔ اس ٹائٹل کے ساتھ ہی وہ مجموعی طور پر بائیس ریسیں جتنے میں بھی کامیاب ہو گئے ہیں۔

کامیابی کے بعد روزبیرگ نے کہا، ’’یہ ایک شان دار ویک اینڈ تھا۔ آج آغاز شان دار رہا۔ میرے پاس ایک اچھی کار تھی۔‘‘ سنگار پور گراں پری کا ٹائٹل ہاتھ سے نکلنے کے باوجود آسٹریلوی ڈرائیوار ریکارڈو نے کہا کہ وہ پرامید ہیں، ’’اس سال ہماری کارکردگی اچھی رہی، میں مایوس نہیں ہوں گا اور بہتر کارکردگی دکھانے کی کوشش کروں گا۔‘‘

عالمی چیمپئن لوئیس ہیملٹن کا کہنا تھا کہ یہ ویک اینڈ ان کے لیے کافی کڑا رہا لیکن نیکو روزبیرگ اس ریس میں کامیابی حاصل کرنے کے حق دار تھے۔ انہوں نے اپنے ساتھی کھلاڑی کو مبارک باد دیتے ہوئے کہا کہ روز بیرگ نے عمدہ کارکردگی کا مظاہرہ کیا ہے۔

اس سیزن میں ابھی چھ ریسیں ہونا باقی ہیں۔ فارمولا ون موٹر ریسنگ کی اس سال کی عالمی چیمپئن شپ کی اگلی دوڑ ملائیشین گراں پری دو اکتوبر کو ملائیشیا میں منعقد کی جائے گی۔

ممکنہ طور پر اس ریس میں کامیابی ساتھ نیکو روزبرگ لوئس ہیملٹن پر اپنی سبقت کو مزید مضبوط بنا سکتے ہیں۔ تاہم ناقدین کا کہنا ہے کہ اس مرتبہ عالمی چیمپئن شپ کا ٹائٹل جیتنے کے لیے مقابلہ کانٹے دار ہو گا۔

گراں پری جیتنے والے ڈرائیور کو پچیس پوائنٹس ملتے ہیں جب کہ دوسرے نمبر پر آنے والے کو اٹھارہ اور تیسری پوزیشن حاصل کرنے والے ڈرائیور کو پندرہ پوائنٹس دیے جاتے ہیں۔