1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

سری لنکا کے ہزارہا تامل مہاجرین بھارت میں

سری لنکا میں حکومتی اَفواج اور تامل باغیوں کے درمیان جنوری کے مہینے سے نئے سرے سے جھڑپیں شروع ہونے کے بعد سے گیارہ ہزار سے زیادہ تامل مہاجرین فرار ہو کر بھارت پہنچ چکے ہیں۔ اِن میں وہ 500 مہاجرین بھی شامل ہیں، جو بدھ کی شام ایک بڑی کشتی کے ذریعے جنوبی بھارتی ریاست تامل ناڈو کے منڈاپَم کیمپ میں پہنچے۔

default

چِنائے میں تامل مہاجرین کی بحالی اور آبادکاری کی ایک غیر سرکاری تنظیم کے سربراہ سی پی چندرا ہاسن ہیں، جو خود بھی سری لنکا کے ایک تامل ہیں لیکن سن 1983ء سے بھارت میں مقیم ہیں۔ اُنہوں نے بتایا کہ نوے کے عشرے کے اوائل سے لے کر اب تک سری لنکا کے 70 ہزار سے زیادہ مہاجرین بھارت میں پناہ لے چکے ہیں۔

واضح رہے کہ بھارت کے اپنے تامل شہریوں کی تعداد 62,2 ملین ہے، جن کے سری لنکا میں بسنے والی تامل آبادی کے ساتھ گہرے ثقافتی رِشتے ہیں۔

سری لنکا میں جاری جھڑپوں کی تازہ لہر میں سالِ رواں کے آغاز سے اب تک 1,500 سے زیادہ افراد مارے جا چکے ہیں جبکہ آنے والے دنوں میں ان جھڑپوں میں اور زیادہ شدت آنے کا امکان ظاہر کیا جا رہا ہے۔