1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

فن و ثقافت

سدا بہار دیوآنند چل بسے

بھارتی فلمی صنعت کے مشہور اداکار دیوآنند 88 برس کی عمر میں اس دنیا سے کوچ کر گئے۔ وہ فلمی صنعت میں ایک سدا بہار ہیرو کے طور پر جانے جاتے تھے۔انہیں بالی ووڈ کا ‘‘گریگری پیک’’ بھی کہا جاتا تھا۔

default

دیوآنند اٹھاسی برس میں فوت ہوئے

دیوآنند کی آخری فلم اسی سال ستمبر میں ریلیز کی گئی تھی۔ چارج شیٹ نامی اس فلم میں وہ اپنے بیٹے کے ساتھ جلوہ گر ہوئے ۔ فلم کی ریلیز کے وقت سے وہ لندن ہی میں مقیم تھے۔ ان کے معاون موہن چوڑی والا نے ان کی ہلاکت کی اطلاع میڈیا کو دی۔ موہن چوڑی والا کے مطابق دیو آنند رحلت سے قبل بہت زیادہ بیمار نہیں تھے۔ان کے لندن میں قیام کی وجہ بھی بنیادی طور پر میڈیکل چیک اپ تھا۔ گزشتہ سالوں سے ان کی صحت مسلسل گرتی چلی آ رہی تھی۔

انہیں بھارتی فلم انڈسٹری کے سنہرے دور کے تین بڑے اداکاروں میں شمار کیا جاتا ہے۔ ان تین میں دیوآنند کے علاوہ دلیپ کمار اور اشوک کمار کے نام آتے ہیں۔ اب اُس گولڈن ایج کے واحد زندہ اداکار دلیپ کمار ہیں۔ دیوآنند نے ایک سو کے قریب فلموں میں کام کیا تھا۔ ان کی پہلی فلم ‘‘ ہم ایک ہیں’’ تھی۔ اس فلم میں ان کے دوست گُرو دت بھی شامل تھے۔ یہ فلم سن 1946 میں ریلیز ہوئی ۔

Bollywoodschauspieler Dev Anand Indien Film Hum donon

دیوآنند کئی مشہور فلموں کے ہیرو تھے

کئی اداکاروں کی تربیت اور نشو و نما میں ان کا ہاتھ رہا۔ پاکستانی ماڈل انیتا ایوب کو بھی انہوں نے اپنی ایک فلم ‘‘پیار کا ترانہ’’ میں کاسٹ کیا تھا۔ زینت امان کو‘‘ ہرے راما ہرے کرشنا’’ فلم سے شہرت ملی تھی۔ ٹینا منیم کو بھی انہوں نے فلم دیس پردیس میں پہلی بار کاسٹ کیا تھا۔ٹینا منیم اب بھارتی ارب پتی صنعت کار انیل امبانی کی اہلیہ ہیں۔

دیوآنند کے دو بھائی چیتھن آنند اور وجےآنند بھی فلمی صنعت سے وابستہ رہے۔ وہ ہدایتکاری کے شعبے سے وابستہ تھے۔ ان کی بیوی کلپنا کارتیک بھی اداکارہ رہ چکی ہیں۔ ان کی بہن شیلا کانتا کے بیٹے شیکھر کپور عالمی شہرت کے حامل ہدایتکار ہیں جو آسکر ایوارڈ کی نامزدگی بھی حاصل کر چکے ہیں۔

Bollywood Filmstar Dilip Kumar

دیوآنند اور اشوک کمار کے علاوہ دلیپ کمار بھارتی فلم انڈسٹری کی گولڈن ایج کے اہم اداکار ہیں

عصر حاضر کے نامی گرامی اداکاروں نے دیوآنند کی رحلت پر اپنے تعزیتی پیغامات سوشل ویب سائٹس پر ریلیز کیے ہیں۔ ان میں نصیر الدین شاہ، امیتابھ بچن، شاہ رخ خان، شبانہ اعظمی اور انوپم کھیر شامل ہیں۔ سلمان رشدی نے بھی اپنے بیان میں کہا کہ وہ ان کی فلمیں دیکھتے ہوئے بڑے ہوئے اور ان کی یادیں ہمیشہ ان کے ساتھ رہیں گی۔

دیوآنند کی پیدائش تقسیم برصغیر پاک و ہند سے قبل ہوئی تھی۔ ان کی پیدائش کا شہر غیر منقسم پنجاب کا ضلع گورداسپور تھا۔ تعلیم کے حصول کے لیے وہ اپنے خاندان کے ہمراہ لاہور چلے گئے تھے۔ لاہور کے مشہور گورنمنٹ کالج کے وہ طالب علم تھے۔

رپورٹ: عابد حسین

ادارت: عصمت جبیں

DW.COM

ویب لنکس