1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

سائنس اور ماحول

سام سانگ اسمارٹ فون کی وجہ سے جہاز خالی کرا لیا گیا

سام سنگ کمپنی کے ایک اسمارٹ فون کے گرم ہونے اور اس سے دھواں نکلنے کے باعث ساؤتھ ویسٹ ایئرلائن کے ایک مسافر جہاز کو خالی کرا لیا گیا۔ یہ واقعہ امریکا کے لوئی وِل ایئرپورٹ پر بدھ کے روز پیش آیا۔

اس واقعے کے بعد سام سنگ کے اسمارٹ فون گلیکسی نوٹ سیون کی خرابی سے متعلق تحفظات ایک مرتبہ پھر بڑھ گئے ہیں۔ بیٹریوں کے ضرورت سے زیادہ گرم ہوجانے کے مسئلے کے باعث اس اسمارٹ فون کو واپس طلب کر لیا گیا تھا۔

جنوبی کوریا کی کمپنی سام سنگ، ساؤتھ ویسٹ ایئرلائن یا امریکی فیڈرل ایوی ایشن سیفٹی کے حکام کی طرف سے یہ تفصیل نہیں بتائی گئی کہ سام سنگ کمپنی کا وہ کون سے ماڈل کا فون تھا جو اس پریشانی کی وجہ بنا۔ ان کی طرف سے میڈیا کو صرف یہی بتایا گیا کہ اس بارے میں مزید تحقیقات کی جا رہی ہیں۔

تاہم انڈیانا سے تعلق رکھنے والی خاتون سارہ گرین نے لوئی وِل کے ایک مقامی اخبار کو بتایا کہ یہ ان کے خاوند کا گلیکسی نوٹ سیون تھا جس میں سے آوازیں آنے لگیں اور اس میں سے دھواں نکلنے لگا۔ ان کا کہنا تھا کہ ایسا اُس وقت ہوا جب ان کے شوہر نے فون کو پرواز سے قبل بند کیا۔

Samsung Galaxy Note 7 (picture-alliance/dpa/J. Mattar)

گلیکسی نوٹ سیون کی بیٹری میں مسائل کی 92 مختلف رپورٹس کے بعد سام سنگ کمپنی نے اس ماڈل کے تمام ٹیلی فون سیٹ واپس منگوانے کا فیصلہ کیا تھا

خبر رساں ادارے ایسوسی ایٹڈ پر یس کے مطابق گرین نے اخبار کو بتایا کہ ان کے شوہر برائن کو واپس منگوائے گئے گلیکسی نوٹ سیون کی جگہ یہ فون دو ہفتے قبل ہی ملا تھا۔ ان کا کہنا تھا کہ اُن کے شوہر نے انہیں یہ تفصیل کسی اور کے فون سے کال کر کے بتائی۔

گلیکسی نوٹ سیون کی بیٹری میں مسائل کی 92 مختلف رپورٹس کے بعد سام سنگ کمپنی نے اس ماڈل کے تمام ٹیلی فون سیٹ واپس منگوانے کا فیصلہ کیا تھا۔ امریکا ہی سے ملنے والی ان رپورٹس میں سے 26 میں جلنے جبکہ 55 میں پراپرٹی کو نقصان کو رپورٹ کیا گیا۔ امریکا کی فیڈرل ایوی ایشن ایڈمنسٹریشن کی طرف سے غیر معمولی طور پر مسافروں کو متنبہ کرنے کا سلسلہ شروع کیا گیا کہ وہ پرواز کے دوران گلیکسی نوٹ سیون کو استعمال یا چارج نہ کریں اور نہ ہی دستی سامان میں اسے رکھیں۔