1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

فن و ثقافت

سارکوزی کی سیاسی زندگی سلور سکرین پر

فرانسیسی صدر نکولا سارکوزی کے سیاسی کیریئر پر بننے والی فلم پر کام شروع ہو گیا ہے۔ اس فلم کو ’ دی کنکسٹ‘ کا نام دیا گیا، جس کی ریلیز آئندہ سال کے آخر تک متوقع ہے۔

default

فرانسیسی صدر نکولا سارکوزی

فرانسیسی روزنامہ لے پاریسیے نے اپنی جمعہ کی اشاعت میں بتایا ہے کہ صدر نکولا سارکوزی کی سیاسی زندگی پر بننے والی فلم The Conquest کی شوٹنگ شروع ہوگئی ہے۔ اس فلم میں فرانسیسی صدر کا کردار Denis Podalydes نبھا رہے ہیں۔ یہ نکتہ اہم ہے کہ ڈینس نے گزشتہ صدارتی انتخابات میں سارکوزی کے انتخابی حریف سیگولین رویال کی کُھل کر حمایت کی تھی۔

اس فلم میں نکولا سارکوزی کے وزیر داخلہ کے دور سے لے کر 2007ء کے صدارتی انتخابات کی مہم تک کے عرصے کا احاطہ کیا گیا ہے۔ اس کے پہلے مناظر کی عکس بندی پیرس کے شمالی علاقے سینٹ ڈینس میں کی گئی۔

Bildgalerie Jahresrückblick 2008 Februar Frankreich

کارلا برونی اپنے شوہر سارکوزی کے ساتھ

فلم 2011ء کے اواخر میں اس وقت نمائش کے لئے پیش کی جائے گی، جب 2012ء کے اوائل میں ہونے والے صدارتی انتخابات کی تیاریاں بھی زوروں پر ہوں گی۔

دوسری جانب فرانسیسی خاتون اوّل کارلا برونی بھی ایک فلم میں جلوہ گر ہو رہی ہیں۔ وہ ابھی جمعرات کو ہی پیرس میں وُڈی ایلن کی فلم ’مِڈنائٹ اِن پیرس‘ کی شوٹنگ میں شریک تھیں، جہاں صدر نکولا سارکوزی اپنی تمام ریاستی مصروفیات کو ترک کرکے ان سے ملنے پہنچے۔ وہ دوگھنٹے تک فلم کے سیٹ پر رہے۔ اس دوران وہ 74سالہ ایلن سے گپ شپ بھی لگاتے رہے اور بعدازاں اپنی اہلیہ برونی کے ساتھ روانہ ہوگئے۔

اس فلم کی شوٹنگ پیرس کے علاقے لیفٹ بینک کے مرکز میں جاری تھی۔ خیال رہےکہ کارلا برونی ماڈل رہی ہیں، جس کے بعد انہوں نے گلوکاری بھی کی اور اب ’مِڈنائٹ اِن پیرس‘ ان کی پہلی فلم ہو گی۔ اس فلم کی کاسٹ میں شامل دیگر ستاروں میں اوین ولسن، ایڈریئن بروڈی اور ماریون کوٹیلارڈ شامل ہیں جبکہ اس فلم کی ریلیز بھی آئندہ برس متوقع ہے۔

رپورٹ: ندیم گِل

ادارت: عدنان اسحاق

DW.COM

ویب لنکس