1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

زیورچ: گولڈ لیگ ایتھلیٹک مقابلوں میں نیا عالمی ریکارڈ

جمیکا کے ایتھلیٹ یُوسین بولٹ کی کامیابیوں کا سفر جاری ہے اور اُنہوں نے اٹھائیس اگست کو سوئٹزرلینڈ میں بھی آسانی سے ایک سو میٹر کی دوڑ جیت لی۔

default

جمیکا کے ایتھلیٹ یُوسین بولٹ

حال ہی میں برلن میں منعقدہ ورلڈ ایتھلیکٹس چیمپئن شپ میں ایک سو میٹر کی دوڑ نو اعشاریہ پانچ آٹھ سیکنڈز میں طے کر کے نیا عالمی ریکارڈ بنانے والے بولٹ نے جمعہ کو سوئٹزرلینڈ کے شہر زیورچ میں ورلڈ کلاس گولڈن لیگ میں بھی پہلی پوزیشن حاصل کی، یہی فاصلہ نو اعشاریہ آٹھ ایک سیکنڈز میں طے کرتے ہوئے۔

زیورچ میں منعقد ہونے والے مقابلے چھ ملین یورو مالیت کے انعامات کے ساتھ یہ دُنیا کے سب سے زیادہ انعامات والی لائٹ ایتھلیٹکس مقابلے ہیں اور اِنہیں جمعہ کو چھبیس ہزار تماشائیوں نے دیکھا۔

بولٹ کو اب اپنی بجلی جیسی پھرتی کا مظاہرہ کرنے کا موقع چار ستمبر کو برسلز میں ملے گا، جہاں گولڈن لیگ کے سلسلے کے چھٹے اور آخری مقابلے منعقد ہوں گے۔

بولٹ کی فتح اور اِسِن باسیوا کے عالمی ریکارڈ کے ساتھ ساتھ زیورچ میں چار کھلاڑیوں نے سال کی بہترین کارکردگی کا بھی مظاہرہ کیا۔

Jelena Issinbajewa Weltrekord Stabhochsprung

پول والٹ کی روسی کھلاڑی ژیلینا اِسِن باژیوا

برلن کی ورلڈ لائٹ ایتھلیکٹس چیمپئن شپ میں پول والٹ کی مایہ ناز روسی کھلاڑی یلینا اِسِن باژیوا کی آنکھوں میں آنسو تھے اور ایک دُنیا حیران تھی کہ اِس ورلڈ اور اولمپک چیمپئن کو ہوا کیا ہےکہ وہ تینوں کوششوں میں ناکام ہو گئی اور سونے کا تمغہ پولینڈ سے تعلق رکھنے والی اُس کی حریف کھلاڑی آنا روگووسکا کو مل گیا۔ جمعہ کو زیورچ میں یلینا اِسِن باژیوا کے چہرے پر مسکراہٹیں تھیں کیونکہ اُس نے پانچ اعشاریہ صفر چھ میٹر اونچا جمپ لگا کر ایک نیا عالمی ریکارڈ قائم کیا۔ اِس طرح اُنہوں نے گذشتہ برس بیجنگ اولمپکس میں اپنے ہی قائم کردہ ریکارڈ کو ایک سینٹی میٹر بہتر بنایا۔

27 سالہ اِسِن باژیوا کا یہ اب تک ستائیس واں عالمی ریکارڈ تھا، جو اُن کے لئے کافی حد تک غیر متوقع بھی تھا۔ اُن کا کہنا تھا، وہ حالیہ تجربے سے یہ سیکھی ہیں کہ عالمی ریکارڈ بنانے کے بجائے صرف مقابلے اور اُس میں فتح پر توجہ مرکوز کرنی چاہیے۔ اُنہوں نے کہا کہ برلن میں جو کچھ ناکامی اُنہیں اُٹھانا پڑی، اِس عالمی ریکارڈ سے اُس کی تلافی ہو گئی ہے۔

رپورٹ: امجد علی

ادارت: ندیم گِل