1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

رافائل نادال جلد ہی دوبارہ ایکشن میں

رافائل نادال اگست میں منعقد ہونے والے مونٹریال ماسٹرز ٹینس ٹورنامنٹ میں شرکت کے لئے اگلے ہفتہ اپنی ٹریننگ کا آغاز کر دیں گے۔ وہ کچھ عرصے سے زخمی ہونے کے باعث ٹینس کورٹ سے باہر تھے۔

default

رافائل نادال ایک مرتبہ پھر بھرپور ایکشن میں دکھائی دیں گے

فرنچ اوپن کے ایک میچ میں اسپین کے یہ کھلاڑی زخمی ہونے کے باعث روبن سوئڈرلنگ کے ہاتھوں شکست کے بعد اس ایونٹ سے باہر ہو گئے تھے۔

رافائل نادال اپنی کہنی کی تکلیف میں مبتلا ہونے کے باعث ومبلڈن اوپن ٹینس میں شرکت نہیں کر پائے تھے۔ اب انہوں نے اپنی ویب سائٹ پراعلان کیا ہے کہ وہ جلد ہی اپنی پریکٹس کا دوبارہ آغاز کرنا چاہتے ہیں۔ ’’مونٹریال کا ایونٹ بہت اہم ہے اور میں اس میں شرکت سے پہلے پوری طرح فٹ ہونا چاہتا ہوں۔‘‘

Rafael Nadal Tennis French Open

نادال اگست میں منٹریال ماسٹرز میں شرکت کے لئے پرامید ہیں

ابھی حال ہی میں بارسلونا میں تفصیلی طبی معائنے کے بعد ان کے معالجین نے انہیں مشورہ دیا تھا کہ وہ دوبارہ اپنی پریکٹس شروع کر سکتے ہیں۔ نادال کا کہنا ہے کہ وہ آئندہ پیر کے روز سے اگلے ماہ ہونے والے مانٹریال ماسٹرز کے لئے بھرپور تیاری کا سلسلہ شروع کر دیں گے۔

نادال کی غیر موجودگی میں راجر فیڈرر نے نہ صرف ومبلڈن کا ٹائٹل بآسانی اپنے نام کر کے پندرہ گرینڈ سلیم جیتنے کا نیا عالمی ریکارڈ قائم کر دیا تھا بلکہ یوں انہوں نے رافائل نادال سے عالمی نمبر ایک کھلاڑی کا اعزاز بھی چھین لیا تھا۔

نادال نے گذشتہ برس اگست میں راجر فیڈرر ہی سے یہ پوزیشن چھینی تھی اور اس کے بعد رواں برس کے آغاز میں آسٹریلین اوپن گرینڈ سلیم کے فائنل میں فیڈرر کو شکست دے کر انہوں نے اپنی یہ پوزیشن مضبوط بھی کر لی تھی۔ اب لیکن انہیں دوبارہ عالمی نمبر ایک بننے کے لئے ایک بار پھر فیڈرر کے خلاف متاثر کن کارکردگی کا مظاہرہ کرناہوگا۔

رپورٹ : عاطف توقیر

ادارت : امجد علی