1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

راجر فیڈرر کا ایک اور اعزاز

سوئٹزر لینڈ کے مشہور ٹینس سٹار راجر فیڈرر نے مردوں کے بین الاقوامی ٹورنامنٹ سٹاک ہوم اوپن میں کامیابی حاصل کر لی ہے۔ اس طرح یہ ان کا 64 واں ٹائٹل ہے، جو اس کھیل میں ان کی صلاحیتوں کا ایک اور ثبوت ہے۔

default

ٹینس سٹار راجر فیڈرر

سٹاک ہوم اوپن میں کامیابی راجر فیڈرر نے جرمنی کے فلوریان مائیر کو شکست دے کر حاصل کی۔ انہوں نے یہ میچ دو سیٹ میں جیتا۔ اس طرح راجر فیڈرر نے 64 ویں بین الاقوامی ٹینس ٹورنامنٹ میں کامیابی حاصل کر کے عظیم امریکی ٹینس لیجنڈ پیٹ سیمپراس کے ریکارڈ کو برابر کردیا ہے۔ ان ٹورنامنٹس کو ATP رینکنگ حاصل ہے۔ بین الاقوامی ٹورنامنٹ جیتنے کی درجہ بندی میں اب فیڈرر اور سیمپراس برابر ہو گئے ہیں۔ ان دونوں کا اس فہرست میں مقام چوتھا ہے۔

سب سے زیادہ بین الاقوامی ٹورنامنٹس جیتنے کا اعزاز امریکی لیجنڈ جمی کونرز کے پاس ہے۔ انہوں نے 148 ایسے بین الاقوامی ٹورنامنٹس جیت رکھے ہیں۔ ان کے بعد ایوان لینڈل کا نام آتا ہے۔ چیکو سلواکیہ سے تعلق رکھنے والے ایوان لینڈل نے اپنے پیشہ ورانہ کھیل کے دوران 144 ٹورنامنٹس جیتے تھے۔ لینڈل اب امریکی شہری بن چکے ہیں۔ تیسرے مقام پر ایک اور امریکی کھلاڑی جان میکنرو ہیں۔ میکنرو نے اپنے دور میں کل 99 ٹورنامنٹس جیتے تھے۔

Rafael Nadal siegt bei den US Open in New York

رافائل نادال

راجر فیڈرر آج کل عالمی درجہ بندی میں دوسرے نمبر پر ہیں۔ پہلی پوزیشن پر ہسپانوی کھلاڑی رافائل ندال ہیں۔ انتیس سالہ فیڈرر کے کھیل میں زوال کے آثار پیدا ہو چکے ہیں۔ اب ان کی پرفارمنس ویسی نہیں رہی جس کی وجہ سے وہ مشہور تھے۔اسی باعث وہ گرینڈ سلیم ٹورنامنٹس میں بھی کامیابی حاصل کرنے میں ناکام رہے ہیں۔ اس کے باوجود وہ مسلسل اپنی سابقہ فارم تلاش کرنے کی کوشش میں ہیں۔

راجر فیڈرر کل سولہ گرینڈ سلیم ٹورنامنٹس جیت چکے ہیں۔ ان میں چار آسٹریلین اوپن، ایک فرنچ اوپن، چھ ویمبلڈن اور پانچ یو ایس اوپن شامل ہیں۔ وہ کئی ہفتوں تک عالمی نمبر ایک رہ چکے ہیں۔ ان کو بعض ٹینس کے مبصرین ہر دور کا عظیم کھلاڑی قرار دیتے ہیں جبکہ بہت سے دوسرے اس مقام پر رافائل ندال کو دیکھ رہے ہیں۔

رپورٹ: عابد حسین

ادارت: ندیم گِل

DW.COM

ویب لنکس