1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

راجر فیڈرر نے اٹھارہواں گرینڈ سلَیم ٹائٹل جیت لیا

رواں برس کے پہلے میجر ٹینس ٹورنامنٹ آسٹریلین اوپن کو راجر فیڈرر نے اپنے نام کر لیا ہے۔ فائنل میچ میں انہوں نے ہسپانوی کھلاڑی رافائل ندال کو شکست دی۔

سن 2017 کے پہلے گرینڈ سلیم ٹورنامنٹ آسٹریلین اوپن کی مردوں کی چیمپئن شپ سوئٹزرلینڈ کے راجر فیڈرر نے جیت لی ہے۔ آسٹریلیا کے شہر میلبورن میں فیڈرر نے ہسپانوی کھلاڑی رافائل ندال کو پانچ سیٹ کے میچ میں تین سیٹ جیت کر ہرایا۔  سوس ٹینس اسٹار نے اٹھارہواں گرینڈ سلیم ٹورنامنٹ  جبکہ اپنے کیریرمیں پانچواں آسٹریلیا اوپن جیتا ہے۔

سن 1968میں شروع ہونے والے اوپن ٹورنامنٹ کے دور میں وہ سب سے طویل العمر کھلاڑی بھی بن گئے ہی، جس نے کسی گرینڈ سلیم ٹورنامنٹ کا فائنل کھیلا اور جیت لیا۔ فیڈرر پینتیس برس کے ہیں۔ آسٹریلین اوپن میں وہ چھ مرتبہ فائنل تک رسائی حاصل کرنے میں کامیاب ہوئے اور پانچ مرتبہ فتع مند رہے۔ ایک مرتبہ شکست کھائی اور وہ بھی ندال کے ہاتھوں سے۔ بائیں بازو سے کھیلنے والے ندال بھی خاصے عرصے کے بعد گرینڈ سلیم ٹورنامنٹ کے فائنل میں پہنچے۔

فیڈرر نے سات برس کے طویل انتظار کے بعد کوئی گرینڈ سلیم ٹورنامنٹ جیتا ہے۔ اِس سے قبل سن 2010 میں انہوں نے میلبورن شہر میں برطانیہ کے اینڈی مرے کو ہرایا تھا۔ آسٹریلین اوپن کے سن 2009 کا فائنل میچ بھی  ندال اور فیڈرر کے درمیان کھیلا گیا تھا۔ تب ندال کو پانچ سیٹ کے میچ میں کامیابی حاصل ہوئی تھی۔

Tennis Australian Open Rafael Nadal - Roger Federer (Getty Images/AFP/G. Wood)

آسٹریلین اوپن کے فائنل میچ میں ندال دو سیٹ جیتنے میں کامیاب رہے

رنرز اپ کی ٹرافی وصول کرنے کے بعد تیس برس کے ہسپانوی کھلاڑی نے اپنے حریف  فیڈررکو شاندار الفاظ میں مبارک دی اور فائنل میچ میں زور دار کھیل پیش کرنے پر بھرپور انداز میں تعریف کی۔ اس فائنل میچ میں فیڈرر کی سروس کے آگے ندال بےبس دکھائی دیے۔ ندال بھی چودہ گرینڈ سلیم ٹورنامنٹ جیت چکے ہیں۔

 ٹینس کے اہم مقابلوں میں فیڈرر اور ندال کے درمیان یہ پینتسواں میچ کھیلا گیا اور ان میں ندال نے تیئیس اور فیڈرر کو بارہ میچوں میں کامیابی حاصل ہوئی۔ دونوں کھلاڑی نو مرتبہ کسی گرینڈ سلیم ٹورنامنٹ کا فائنل کھیلنے کے لیے کورٹ میں اترے اور ان میں چھ ندال نے جبکہ تین فیڈرر نے جیتے۔

 راجر فیڈرر کا یہ اٹھارہواں گرینڈ سلَیم ٹائٹل ہے۔ امریکی ٹینس کھلاڑی پیٹ سمپراس اور رافائل ندال چودہ چودہ میجر ٹورنامنٹس جیت کر دوسرے مقام پر ہیں۔ آسٹریلین اوپن کا فائنل میچ تین گھنٹے اور اڑتیس منٹ تک جاری رہا۔ میچ کا اسکور فیڈرر کے حق میں چھ چار، تین چھ، چھ ایک، تین چھ اور چھ تین کی صورت میں رہا۔