1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

معاشرہ

دنیا کا دوسرا سب سے بڑا گلابی ہیرا سترہ ملین یورو میں نیلام

انتہائی نایاب قسم کے گلابی ہیروں میں سے دنیا کا دوسرا سب سے بڑا ہیرا ’فینسی وِیوِڈ‘ سوئٹزرلینڈ میں اٹھارہ اعشاریہ ایک ملین سوئس فرانک یا قریب سترہ ملین یورو کے عوض نیلام کر دیا گیا۔ خریدار کی شناخت ظاہر نہیں کی گئی۔

Juwelenauktion bei Christie's - Rosafarbener Diamant The Pink (picture-alliance/dpa/J.-C. Bott)

دنیا کا یہ دوسرا سب سے بڑا گلابی ہیرا قریب سترہ ملین یورو میں نیلام ہوا

سوئٹزرلینڈ کے شہر جنیوا سے بدھ سولہ نومبر کے روز موصولہ جرمن نیوز ایجنسی ڈی پی اے کی رپورٹوں کے مطابق اس ہیرے کی فروخت کے لیے بولی جنیوا ہی میں منگل پندرہ نومبر کی رات بین الاقوامی سطح پر مشہور آکشن ہاؤس ’کِ‍رسٹِیز‘ کے ایک نیلام گھر میں لگائی گئی۔

Christie's کی طرف سے بتایا گیا ہے کہ اس انتہائی نایاب لیکن بہت بڑے ہیرے کو ایک ایسی شخصیت نے ٹیلی فون پر بولی لگا کر خریدا، جو اپنی شناخت ظاہر نہیں کرنا چاہتی تھی۔ ’فینسی وِیوِڈ‘ (Fancy Vivid) نامی گلابی رنگ کے ایسے ہیرے دنیا میں بہت ہی کمیاب ہیں اور ایسے ہی کسی ایک قیمتی پتھر کے لیے ادا کی جانے والی 18.1 ملین سوئس فرانک یا تقریباﹰ 17 ملین یورو کی قیمت دنیا بھر میں ایسے کسی ہیرے کے لیے آج تک ادا کی گئی دوسری سب سے بڑی قیمت ہے۔

ماہرین کے مطابق دنیا بھر میں ہر سال ہیرے کی کانوں سے جتنے بھی ہیرے نکالے جاتے ہیں، ان میں سے محض ایک فیصد قیمتی پتھر ہی گلابی رنگ اور اس قسم کے ہوتے ہیں۔ جنیوا میں گزشتہ رات ایسا جو نایاب ہیرا نیلام کیا گیا، اسے ناشپاتی کی شکل میں تراشا گیا ہے اور اس کے نئے مالک کی قومیت بھی ظاہر نہیں کی گئی۔

’کرِسٹیِز‘ کے جاری کردہ ایک بیان کے مطابق 9.14 قیراط وزن کا یہ ہیرا اپنی ہیئت اور رنگت کے لحاظ سے دنیا کا دوسرا سب سے بڑا ہیرا ہے اور گزشتہ چند برسوں کے دوران مختلف ملکوں کی ارب پتی شخصیات میں اس طرح کے ہیروں کی طلب واضح طور پر زیادہ ہوئی ہے۔

Euro / Banknoten / Geldscheine (picture-alliance/dpa)

اس گلابی ہیرے کے لیے ٹیلی فون پر قریب سترہ ملین یورو ادا کرنے والا خریدار اپنی شناخت ظاہر نہیں کرنا چاہتا تھا

اس قسم کے دنیا کے سب سے بڑے گلابی ہیرے کا وزن 15.38 قیراط ہے، جو اسی سال جنیوا میں Sotheby's آکشن ہاؤس نے 26.6 ملین یورو میں نیلام کیا تھا۔ یہ قیمت بین الاقوامی سطح پر کسی ایک ہیرے کے لیے ادا کی جانے والی سب سے زیادہ قیمت تھی۔

جنیوا میں 15 نومبر کی رات Fancy Vivid کی نیلامی اپنے آغاز کے محض ساڑھے تین منٹ بعد ہی مکمل ہو گئی اور اس نایاب ہیرے کو اس کا نیا مالک خرید چکا تھا۔

DW.COM