1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

دفاعی چیمپیئن اٹلی فیفا ورلڈ کپ سے باہر

فیفا ورلڈ کپ 2010ء کے پہلے مرحلے میں اب تک کئی چونکا دینے والے نتائج سامنے آئے ہیں۔ فرانس، یونان اور ڈنمارک کی طرح اب دفاعی چیمپیئن اٹلی بھی ٹورنامنٹ سے باہر ہوگیا ہے۔

default

جنوبی افریقہ میں جاری انیسویں عالمی کپ کا پہلا راوٴنڈ حیران کردینے والے نتائج سے بھرپور رہا ہے۔ جمعرات کے روز گروپ ’ای‘ اور گروپ ’ایف‘ میں دو دو میچ کھیلے گئے۔

گروپ ای میں جاپان نے ڈنمارک کو ایک کے مقابلے میں تین گول سے شکست دے کر ٹورنامنٹ سے باہر کردیا اور خود ناک آوٴٹ مرحلے کے لئے کوالیفائی کر گیا۔ اسی گروپ میں نیدرلینڈس نے کیمرون کو دو ایک سے شکست دی اور اس طرح کیمرون بھی ٹورنامنٹ سے باہر ہو گیا۔ نیدرلینڈس اپنے تینوں میچ جیت کر گروپ ای میں نو پوائنٹس کے ساتھ سر فہرست ہے جبکہ جاپان کی ٹیم دو میچ جیت کر چھ پوائنٹس کے ساتھ دوسری پوزیشن پر ہے۔

Fußball WM 2010 Slowakei Italien

فتح کے بعد سلوویکیا کے ایک کھلاڑی اپنے منفرد انداز میں خوشی مناتا ہوا

گروپ ایف سے دفاعی چیمپیئن اٹلی اور نیوزی لینڈ باہر ہوگئے ہیں۔ حیرت کی بات یہ ہے کہ گزشتہ ورلڈ کپ کی چیمپیئن ٹیم اٹلی اپنا کوئی بھی میچ جیت نہیں سکی۔ نیوزی لینڈ اپنے تینوں میچ ڈرا کرنے میں کامیاب رہا تاہم محض تین پوائنٹس حاصل کرکے ٹورنامنٹ سے باہر ہوگیا۔

جمعرات کو سلوویکیا نے اٹلی کو دو کے مقابلے میں تین گول سے ہرایا جبکہ پیراگوائے اور نیوزی لینڈ کا میچ صفر صفر کی برابری پر ختم ہوا۔ اس گروپ سے پیراگوائے اور سلوویکیا بالترتیب پانچ اور چار پوائنٹس کے ساتھ اگلے مرحلے تک رسائی حاصل کرنے میں کامیاب رہے۔ اٹلی نے اپنے تین گروپ میچوں میں دو ڈرا کئے اور ایک میں اسے شکست ہوئی اور اس طرح اسے دو پوائنٹس کے ساتھ آخری پوزیشن نصیب ہوئی۔

دریں اثناء جمعہ کو گروپ ’جی‘ میں پانچ مرتبہ عالمی چیمپیئن برازیل کا مقابلہ پرتگال سے ہو رہا ہے۔ اسی گروپ میں جمعہ کو شمالی کوریا اور آئیوری کوسٹ کی ٹیمیں مد مقابل ہوں گی۔ گروپ ’ایچ‘ میں چلی کا مقابلہ سپین سے جبکہ دوسرا مقابلہ سوئٹزرلینڈ اور ہونڈوراس کی ٹیموں کے درمیان ہو رہا ہے۔

رپورٹ: گوہر نذیر گیلانی

ادارت: ندیم گِل

DW.COM