1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

حیدر آباد ٹیسٹ: نیوزی لینڈ کا اچھا آغاز

بھارت اور نیوزی لینڈ کے مابین کھیلے جا رہے دوسرے ٹیسٹ میچ کے پہلے دن کے اختتام تک نیوزی لینڈ نے پہلے کھیلتے ہوئے چار وکٹوں کے نقصان پر258 رنز بنا لئے ہیں۔

default

بھارتی ٹیم کے کھلاڑی

تین ٹیسٹ میچوں کی سیریز کے سلسلے میں بھارتی شہر حیدر آباد میں جاری دوسرے ٹیسٹ میچ میں مہمان ٹیم نیوزی لینڈ نے ٹاس جیت کر پہلے کھیلنے کا فیصلہ کیا۔ نیوزی لینڈ کے ایک اوپنر بی بی میکلم چار رنز بنا کر اگرچہ چوتھے اوور میں ہی آؤٹ ہو گئے تاہم ون ڈاؤن بلے باز ایم جے گُپٹل اور دوسرے اوپنر ٹم میکنٹوش نے ٹیم کو سنبھالا دیا اور دوسری وکٹ کی شراکت میں 147 رنز بنائے۔

میکنٹوش نے 102 رنز بنائے اور پہلے دن کے اختتام سے کچھ دیر قبل ہی وہ ظہیر خان کی ایک عمدہ گیند پر بولڈ ہو گئے جبکہ میکلم پچاسی رنز بنا کر پویلین لوٹے۔ میکنٹوش کے بین الاقوامی کیریئر کی دوسری سینچری میں ایک چھکا اور دس چوکے شامل رہے۔ ان دونوں کھلاڑیوں کی ساجھے داری نے بھارتی بولروں کو کڑا وقت دیا تاہم بھارتی فاسٹ بولروں ظہیر خان اور سری شانت کے ساتھ ساتھ دیگر بولروں نے بھی اپنی سر توڑ کوششیں جاری رکھیں اور آخر کار یہ انتہائی اہم پارٹنر شپ توڑ دی۔

Zaheer Khan

بھارت کے کامیاب ترین بولر ظہیر خان

اس کے بعد دوسرے نمبر پر آنے والے کیوی بلے باز روس ٹیلر چوبیس رنز کے انفرادی سکور پر جلد ہی آؤٹ ہو گئے۔ انہیں بھی ظہیر خان نے آؤٹ کیا۔ پہلے دن کے اختتام پر جیسی رائڈر بائس جبکہ نائٹ واچ مین ہاپکِنز بغیر کوئی سکور بنائے ناٹ آؤٹ تھے۔

بھارت کی طرف سے ظہیر خان کامیاب ترین بولر رہے، جنہوں نے اٹھارہ اوور کئے اور دو کھلاڑیوں کو آؤٹ کیا جبکہ پی پی اوجھا اور سری شانت نے ایک ایک وکٹ حاصل کی۔ پہلے دن کے کھیل میں مقررہ نوے اوورز پورے کرائے گئے۔

خیال رہے کہ نیوزی لینڈ اور بھارت کے مابین کھیلی جا رہی تین ٹیسٹ میچوں کی یہ سیریز فی الحال برابر ہے۔ احمد آباد میں کھیلا گیا پہلا ٹیسٹ میچ بغیر کسی نتیجے کے ہی ختم ہو گیا تھا۔

رپورٹ: عاطف بلوچ

ادارت: امجد علی

DW.COM