1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

حنا ربانی کھر پہلی خاتون وزیر خارجہ بن گئیں

حنا ربانی کھر پاکستان کی پہلی خاتون وزیر خارجہ بن گئی ہیں۔ وہ یہ عہدہ سنبھالنے والی کم عمر ترین وزیر بھی ہیں۔ انہوں نے منگل کو وزارت خارجہ کا قلمدان سنبھالا۔

default

حنا ربانی کھر

پاکستانی وزارتِ خارجہ نے بیان میں کہا ہے: ’’وزیر اعظم یوسف رضا گیلانی کے مشورے پر، صدرِ پاکستان نے حنا ربانی کھر کو وزیر خارجہ کے عہدے پر ترقی دینے کا فیصلہ کیا ہے۔‘‘

انہیں بھارت کے ساتھ اہم امن مذاکرات سے کچھ ہی دِن قبل یہ عہدہ دیا گیا ہے۔ چونتیس سالہ حنا ربانی کی رواں ہفتے انڈونیشیا میں آسیان کے اجلاس کے موقع پر امریکی وزیر خارجہ ہلیری کلنٹن سے ملاقات بھی متوقع ہے۔

وزارت خارجہ کے مطابق حنا ربانی انڈونیشیا سے واپسی پر بھارت روانہ ہو جائیں گی، جہاں وہ وزارتی سطح کے مذاکرات میں شریک ہوں گی۔

انہوں نے منگل کو قائم مقام صدر فاروق نائیک کے سامنے حلف اٹھایا۔ پاکستانی صدر آصف زرداری دورہ افغانستان پر تھے۔

خبررساں ادارے اے ایف پی کے مطابق بعض تجزیہ کاروں نے حنا ربانی کی تقرری پر سوال اٹھائے ہیں۔ ان کا کہنا ہے کہ جونیئر وزیر خارجہ کے طور پر پانچ ماہ تک ذمہ داریاں سنبھالنے کے باوجود کیا وہ اتنا تجربہ رکھتی ہیں کہ سفارتی لحاظ سے مشکل وقت میں پاکستانی کی خارجہ پالیسی کو آگے بڑھا سکیں۔

UN Pakistan Außenminister Shah Mahmood Qureshi zu Hilfe aus Indien

شاہ محمود قریشی

سیاسی تجزیہ کار حسن عسکری کا کہنا ہے کہ حنا ربانی کی تقرری سے خارجہ پالیسی سازی میں وزارت خارجہ کا کردار کم ہو جائے گا جبکہ اس تاثر کو ہوا ملے گی کہ خارجہ پالیسی کہیں اور طے پاتی ہے۔

حسن عسکری نے کہا: ’’بین الاقوامی سطح پر انہیں سنجیدگی سے نہیں دیکھا جائے گا۔‘‘

حنا ربانی کھر کا تعلق پاکستانی صوبہ پنجاب کے ضلع مظفر گڑھ سے ہے۔ وہ سابق فوجی حکمران پرویز مشرف کے دور حکومت میں جونیئر وزیر برائے اقتصادی امور رہیں۔ 2008ء کے انتخابات میں وہ موجودہ حکمران جماعت پاکستان پیپلز پارٹی میں شامل ہو گئی تھیں۔

سابق وزیر خارجہ شاہ محمود قریشی کو رواں برس فروری میں کابینہ میں تبدیلیوں کے وقت ہٹا دیا گیا تھا اور اس وقت سے اس عہدے کے لیے کوئی تقرری عمل میں نہیں آئی تھی۔

رپورٹ: ندیم گِل/خبر رساں ادارے

ادارت: امتیاز احمد

DW.COM

ویب لنکس