1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

جنوبی کوریا کا آئل ٹینکر: صومالی قزاقوں کا قبضہ

صومالی بحری قزاقوں نے اتوار کے روز جنوبی کوریا کا آئل ٹینکر اغوا کر لیا ہے۔ اس ٹینکر پر 170 ملین ڈالر کا خام تیل لدا ہوا ہے اور یہ جہاز عراق سے امریکہ جا رہا تھا۔

default

حکام کے مطابق اس واقعے سے واضح ہو رہا ہے کہ صومالی قزاق کا اہم ہدف خلیج عدن سے گزرنے والے بڑے بحری جہاز ہیں۔ سامہو ڈریم نامی یہ آئل ٹینکر ایک ہزار بانوے فٹ طویل ہے اور اس پر دو ملین بیرل تیل لادنے کی گنجائش ہے۔ جنوبی کوریا کی وزارت خارجہ کے مطابق اغوا ہونے والے اس بحری جہاز پر جنوبی کوریا کے پانچ اور فلپائن کے 19 شہری موجود ہیں۔

تیل کی صفائی کی امریکی کمپنی والرو اینرجی کارپوریشن نے کہا ہے کہ جہاز پر لدا ہوا تیل اس کی ملکیت تھا۔ اس کمپنی کے ایک ترجمان کے مطابق اس جہاز کی منزل امریکی گلف کوسٹ تھی اور اسے مشرقی افریقی سمندری علاقے میں اغوا کیا گیا۔

Tanker Sirius Star in Rotterdam PANO

اکتوبر 2008 میں ایک سعودی آئل ٹینکر کو بھی اغوا کر لیا گیا تھا

خلیج عدن میں صومالی قزاقوں کی بڑھتی ہوئی کارروائیوں کے باعث اب بحری جہاز نہر سوئز کے بجائے براعظم افریقہ کا چکر کاٹتے ہوئے یورپ اور امریکہ تک پہنچنے کا راستہ اختیار کرتے ہیں اور اس وجہ سے پہلے ہی کاروباری اداروں کو وقتی تاخیر کے ساتھ ساتھ کئی ملین ڈالر اضافی سفری اخراجات کا سامنا کرنا پڑتا ہے۔

سال 2008ء میں بھی صومالی قزاقوں نے سعودی سپر ٹینکر Sirius Star اغوا کر لیا تھا اور خیال ظاہر کیا جاتا ہے کہ اس ٹینکر کو بازیاب کرانے کے لئے 5.5 تا 7 ملین ڈالر ادا کئے گئے تھے۔

رپورٹ : عاطف توقیر

ادارت : کشورمصطفیٰ