1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

جنسی زیادتی کے الزامات بے بنیاد ہیں، کارڈینل پیل

ویٹیکن میں انتہائی طاقت ور سمجھے جانے والے کارڈینل جارج پیل نے خود پر آسٹریلوی پولیس کی جانب سے جنسی زیادتی کے حوالے سے عائد کردہ الزامات کو ’سختی سے مسترد‘ کیا ہے۔

آسٹریلیا کی ریاست وکٹوریا کی پولیس نے جمعرات کو 76 سالہ کارڈینل پیل پر ماضی میں ’جنسی حملوں‘ کے الزامات عائد کیے تھے۔ پولیس کے مطابق جارج پیل ماضی میں متعدد مرتبہ ایسے حملوں میں ملوث رہے۔ کارڈینل پیل اس وقت ویٹیکن میں خزانے کے محکمے کے سربراہ ہیں۔

وکٹوریا ریاست کی پولیس کے نائب کمشنر شان پاٹون نے صحافیوں سے بات چیت میں کہا، ’’کارڈینل پیل کو طلب کرنے کے احکامات پر وہ الزامات درج ہیں۔ انہیں 18 جولائی کو میلبورن کی مجسٹریٹ کورٹ میں پیش ہونے کے لیے کہا گیا، تاکہ مقدمے کی سماعت ہو سکے۔‘‘

Papst beim 23. Weltjugendtag in Australien (AP)

کارڈینل پیل کو ویٹیکن میں انتہائی بااثر عہدہ دار سمجھا جاتا ہے

جمعرات کو عدالتی طلبی سے متعلق مراسلہ میلبورن میں پیل کے قانونی نمائندوں کے حوالے کیا گیا۔ پاٹون نے مزید بتایا کہ پیل کو اس بابت متعدد شکایت کندگان کی جانب سے اس طرز کے کئی الزامات کا سامنا ہے۔

سڈنی میں کیتھولک چرچ کے آرچ ڈائیسیس کی طرف سے جمعرات کے روز جاری کردہ ایک بیان میں کہا گیا ہے کہ اپنے معالجین کی اجازت اور سفری انتظامات کے بعد کارڈینل جلد ہی آسٹریلیا واپس لوٹ آئیں گے، تاکہ خود پر عائد الزامات کا جواب دے کر اس معاملے سے بری ہو سکیں۔ ’’وہ اس دن کا انتظار کر رہے ہیں تاکہ ان جھوٹے الزامات کے جواب میں عدالت میں اپنا دفاع کر سکیں۔‘‘

مقامی میڈیا کا کہنا ہے کہ اسی معاملے کے تناظر میں کارڈینل پیل کے وکلاء نے جمعرات کو میلبورن کی مجسٹریٹ کورٹ کا دورہ بھی کیا۔

چھ جولائی کو مجسٹریٹ یہ فیصلہ سنائیں گے کہ آیا کارڈینل پیل پر عائد الزامات اور مقدمے کی سماعت سے متعلق معلومات عوام کے سامنے پیش کی جائیں یا نہیں۔

پولیس کی جانب سے تاہم یہ واضح نہیں کیا گیا ہے کہ کارڈینل پیل پر کس طرح کے الزامات عائد ہیں، تاہم ماضی میں کارڈینل پیل پر سن 1970 کی دہائی میں بہ طور پادری آسٹریلوی علاقے بالارت میں جنسی زیادتی سے متعلق الزامات سامنے آتے رہے ہیں۔ کارڈینل پیل بعد میں میلبورن اور پھر سڈنی کے آرچ بشپ کے عہدے پر فائز رہ چکے ہیں۔