1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

جرمن وزیر خارجہ کا دورہ ہیٹی

جرمن وزیرخارجہ گیڈو ویسٹر ویلے آج ہیٹی پہنچ رہے ہیں۔ ہیٹی ان کےچار ملکی دورے کی آخری منزل ہے۔ وہ صدر مشل مارٹیلی سے ملاقات کریں گے۔

default

جرمن وزیر خارجہ گیڈو ویسٹر ویلے کے دورے کا مقصد زلزلے سے تباہ حال اس ملک میں جرمنی کے تعاون سے چلنے والے تعمیر نو کے منصوبوں کا جائزہ لینا ہے۔ ہیٹی کے صدر مشل مارٹیلی سے بات چیت میں بھی تعمیر نو کے موضوع کو ہی مرکزی حیثیت حاصل رہے گی۔ ویسٹر ویلے نے ہیٹی پہنچنے سے قبل ہی اس ملک کے لیے مزید جرمن امداد کا وعدہ کیا ہے۔ ہیٹی میں جنوری 2010ء میں آنے والے زلزلے میں دو لاکھ سے زائد افراد ہلاک ہوئے تھے۔ ساتھ ہی کئی شہروں کا بنیادی ڈھانچہ تقریباً تباہ ہوگیا تھا۔

Haiti Deutschland Gabriele Benz bei einem Einsatz von Ärzte ohne Grenzen auf Haiti

ویسٹر ویلے نے ہیٹی کے لیے مزید جرمن امداد کا وعدہ کیا ہے

ہیٹی میں صدر مشل مارٹیلی نے مئی میں حلف اٹھایا تھا تاہم ابھی تک وہ کابینہ تشکیل دینے میں کامیاب نہیں ہو سکے ہیں۔ جرمن وزیر خارجہ گیڈو ویسٹر ویلے کے بقول ہیٹی میں حکومت سازی کے عمل کو فوری طور پر مکمل ہو جانا چاہیے۔ میکسیکو سے ہیٹی کے لیے روانہ ہونے سے کچھ دیر قبل جرمن وزیرخارجہ نے کہا کہ ہیٹی کو اپنی مشکلات سے باہر نکلنے کے لیے خود ہی کوششیں کرنا ہوں گی۔ مزید یہ کہ اس سلسلے میں ایک مضبوط حکومت کا ہونا بہت ضروری ہے۔

ہیٹی میں ڈیڑھ برس پہلے آنے والے زلزلے کے بعد ابھی تک دس لاکھ سے زائد افراد بے گھر ہیں۔ جرمن وزیر خارجہ کا کہنا ہے کہ جرمن حکومت ہیٹی کے عوام کو بھولی نہیں ہے۔ ہیٹی جرمن وزیر خارجہ کے امریکی ممالک کے دورے کا آخری پڑاؤ ہے۔ اس سے قبل وہ ریاست ہائے متحدہ امریکہ، کولمبیا اور میکسیکو کا دورہ کر چکے ہیں۔

رپورٹ : عدنان اسحاق

ادارت: شامل شمس