1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

جرمن صدر کا دورہء عمان مکمل، آج قطر کے لیے روانگی

جمعرات کو عمان (اومان) کا سہ روزہ دورہ شروع کرنے والے جرمن صدر کرسٹیان وولف آج ہفتے کی سہ پہر اپنے خلیجی ملکوں کے چھ روزہ دورے کی اگلی منزل قطر کے لیے روانہ ہو جائیں گے۔ بعد ازاں وہ متحدہ عرب امارات بھی جائیں گے۔

جرمن صدر کرسٹیان وولف

جرمن صدر کرسٹیان وولف

عمان کے اِس دورے کا مقصد وہاں چار عشروں سے برسرِ اقتدار چلے آ رہے سلطان قابوس کے ساتھ جرمنی اور عمان کے مابین تعاون کے فروغ کے موضوع پر مذاکرات کرنا تھا۔ 1993ء کے بعد سے کسی جرمن صدر کا اِس جزیرہ نما عرب کا یہ پہلا دورہ ہے۔ جرمنی میں عمان کو اس لیے بھی اہم خیال کیا جاتا ہے کہ اس کے نہ صرف عرب دُنیا کے ساتھ بلکہ پاکستان اور افغانستان کے ساتھ بھی قریبی تعلقات ہیں۔

اِس دورے میں اُن کی اہلیہ بیٹینا بھی اُن کے ہمراہ ہیں۔ جرمن صدر قطر روانگی سے پہلے آج ہفتے کو عمان کے دارالحکومت مسقط میں سول سوسائٹی کے نمائندوں کے ساتھ عرب دُنیا کے بحرانی حالات پر تبادلہء خیال کر رہے ہیں۔

مسقط کی سلطان قابوس مسجد دُنیا کی بڑی مساجد میں شمار ہوتی ہے

مسقط کی سلطان قابوس مسجد دُنیا کی بڑی مساجد میں شمار ہوتی ہے

آج ہی وولف اور اُن کی اہلیہ مسقط کی سلطان قابوس مسجد دیکھنے جا رہے ہیں، جو دنُیا کی بڑی مساجد میں شمار ہوتی ہے اور جہاں ایک ہی وقت میں 16 ہزار مسلمان نماز ادا کر سکتے ہیں۔ جرمن صدر کے پروگرام میں شاہی اوپیرا ہاؤس کا دورہ بھی شامل ہے، جس کا افتتاح اسی سال اکتوبر میں عمل میں آیا تھا۔

قطر کے دارالحکومت دوحہ میں وولف قطر کے فرمانروا شیخ حماد بن خلیفہ الثانی کے ساتھ مشرقِ وُسطیٰ اور خطّے کے دیگر عرب ملکوں کی نازک سیاسی صورتحال پر تبادلہء خیال کریں گے۔ قطر ہی کی صدارت میں حال ہی میں عرب لیگ نے شام پر دباؤ بڑھا دیا تھا تاکہ اُسے اپنے ہاں اپوزیشن کے خلاف پُر تشدد کارروائیاں بند کرنے پر مجبور کیا جا سکے۔

سلطان قابوس گزشتہ چار عشروں سے حکومت کرتے چلے آ رہے ہیں

سلطان قابوس گزشتہ چار عشروں سے حکومت کرتے چلے آ رہے ہیں

خلیجی ملکوں کے اِن دوروں کا مقصد نہ صرف وہاں اصلاحات کے خواہاں عناصر کی حوصلہ افزائی کرنا ہے بلکہ تجارتی تعلقات کو بھی مزید مستحکم بنانا ہے۔ جرمن مبصرین کے خیال میں تجارت کی وساطت سے بھی ان عرب ملکوں میں سماجی تبدیلی کے لیے راہ ہموار کی جا سکتی ہے۔ ایک جرمن کاروباری شخصیت نے حال ہی میں عمان کے صحراؤں کے بیچوں بیچ سیمنٹ کی پیداوار کا کام شروع کیا ہے۔ قطر میں جرمن صدر کی موجودگی میں جرمن ادارہ Siemens قطر کے ساتھ اقتصادی تعاون کے ایک سمجھوتے پر دستخط کرے گا۔

رپورٹ: خبر رساں ادارے / امجد علی

ادارت: عاطف توقیر

DW.COM

ویب لنکس