1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

جرمن حکام کی طرف سے ترک مذہبی رہنما سے تفتیش

میڈیا رپورٹوں کے مطابق جرمن دفتر استغاثة ترکی کی مذہبی تنظیم دیانت کے اعلیٰ ترین رہنماؤں میں سے ایک سے تفتیش کر رہا ہے۔ یہ پیشرفت ایک ایسے موقع پر سامنے آئی ہے جب برلن اور انقرہ کے تعلقات میں کشیدگی بڑھ رہی ہے۔

جرمن میڈیا کے ایک نیٹ ورک نے جمعہ 31 مارچ کی شب رپورٹ کیا کہ دیانت کے غیر ملکی تعلقات سے متعلق شعبے کے سربراہ ہالیفے کیسکِن نے دنیا بھر میں ترک سفارتی مشنوں کو  مبینہ طور پر کہا ہے کہ وہ فتح اللہ گولن کے گروپ کے حامیوں کی فہرست مرتب کرے۔

اس جرمن میڈیا گروپ میں ’’زوڈ ڈوئچے سائٹنگ‘‘، NDR اور WDR شامل ہیں۔ ترک حکومت جولائی 2016ء میں ہونے والی ناکام فوجی بغاوت کی ذمہ داری فتح اللہ گولن کے گروپ پر عائد کرتی ہے۔ تاہم امریکا میں مقیم گولن ان الزامات کو مسترد کرتے ہیں۔

جرمن تفتیش کاروں کے مطابق دیانت کی طرف سے اس درخواست پر مبنی مواد اندرونی معاملات جاننے والے ایک شخص نے جرمن شہر کالسروہے کے حکام کو فراہم کیا۔ اس دستاویز کے مطابق کیسکن نے جرمنی میں موجود اماموں سے بھی کہا ہے کہ وہ گولن کے حامیوں کے بارے میں معلومات جمع کریں۔ کیسکن کے خلاف تحقیقات کا آغاز 13 مارچ کو کیا گیا۔

جرمنی کے وفاقی دفتر استغاثہ کی طرف سے چند روز قبل جاسوسی سے متعلق تحقیقات کے بارے میں تصدیق کی جا چکی ہے۔ دیانت کی طرف سے مقرر کردہ اماموں پر جاسوسی کے الزامات بھی قبل ازیں منظر عام پر آ چکے ہیں۔

خیال رہے کہ جرمنی کی غیر ملکی جاسوسی سے متعلق ایجنسی MIT نے فروری میں جرمن انٹیلیجنس کو فتح اللہ گولن مبینہ حامی 300 افراد کی ایک فہرست دی اور درخواست کی تھی ان افراد پر نظر رکھی جائے۔ اس فہرست میں جرمن پارلیمان کی ایک خاتون رکن مشیل میونٹے فیرنگ کا نام بھی شامل تھا۔

ویڈیو دیکھیے 02:21

’ترکی یورپی یونین معاہدہ‘ خطرے میں، مہاجرین کا مستقبل کیا ہو گا

Audios and videos on the topic