1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

جرمنی: ایک کلینک میں فائرنگ، دو ڈاکٹر ہلاک

جرمنی کے ایک مغربی شہر ماربرگ میں ایک کلینک میں ہونے والی فائرنگ کے نتیجے میں وہاں کام کرنے والے دو فزیشن ہلاک ہو گئے ہیں۔ یہ بات جرمن حکام کی جانب سے بتائی گئی ہے۔

جرمن شہر مار برگ میں فائرنگ کے ایک واقعے میں دو افراد ہلاک ہو گئے ہیں۔ صوبے ہیسے کی پولیس نے بتایا کہ انہیں مار برگ کے ریلوے اسٹیشن کے قریب فائرنگ کی اطلاع ملی تھی۔ اس بیان میں کہا گیا کہ جب پولیس متعلقہ مقام پر پہنچی تو اسے کئی دکانوں والی ایک عمارت میں دو افراد مردہ حالت میں ملے۔

پولیس نے ریلوے اسٹیشن کے قریب ایک بڑے علاقے کا محاصرہ کر کے وہاں تحقیقات کا آغاز کر دیا ہے۔ ابھی تک اس واقعے کے پس منظر کے بارے میں کچھ بھی نہیں بتایا گیا ہے۔

جرمن خبر رساں ادارے ڈی پی اے کے مطابق فائرنگ کا یہ واقعہ ماربرگ کے مرکزی اسٹیشن کے قریب ایک دفتر میں پیش آیا۔ ماربرگ جرمن شہر فرینکفرٹ سے 100 کلومیٹر شمال میں واقع ہے۔

ڈی پی اے نے عینی شاہدین کے حوالے سے بتایا ہے کہ انہوں نے مقامی وقت کے مطابق دن کے 12:50 پر فائرنگ کی آواز سنی اور پولیس کو مطلع کر دیا۔ ہلاک شدگان کی لاشیں ایک عمارت سے ملیں جہاں ڈاکٹر کا ایک کلینک اور رہائشی اپارٹمنٹس موجود ہیں۔ دونوں افراد کو کئی مرتبہ گولیاں لگی تھیں۔