1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

جرمنی اور گھانا ناک آوٴٹ مرحلے میں داخل

جنوبی افریقہ میں جاری انیسویں فیفا ورلڈ کپ ٹورنامنٹ میں گروپ ’ڈی‘ کے ایک اہم میچ میں جرمنی نے گھانا کو صفر کے مقابلے میں ایک گول سے شکست دے کر اگلے مرحلے کے لئے کوالیفائی کر لیا ہے۔

default

میچ ہارنے کے باوجود گھانا چار پوائنٹس کے ساتھ اس گروپ میں دوسری پوزیشن پر ہے۔ اس طرح گھانا کی ٹیم بھی ناک آؤٹ مرحلے کے لئے کوالیفائی کر گئی ہے۔

جوہانسبرگ میں کھیلے گئے اس میچ میں گھانا کی ٹیم نے اگرچہ بہتر کھیل کا مظاہرہ کیا تاہم اسے کامیابی حاصل نہ ہو سکی۔ اس میچ کو دیکھنے کے لئے 83 ہزار سے زائد تماشائی سٹیڈیم میں موجود تھے۔

WM Südafrika 2010 Ghana vs Deutschland Flash-Galerie

جرمنی اس جیت کے ساتھ ہی اگلے مرحلے کے لئے کوالیفائی کر گیا ہے

گھانا کے خلاف جیت کے نتیجے میں جرمنی ٹیبل پر چھ پوائنٹس کے ساتھ اس گروپ میں سب سے اوپر چلا گیا ہے۔

تین مرتبہ عالمی چیمپیئن جرمنی اس میچ میں بہرحال وہ کھیل نہ دکھا سکی، جس کی اس سے توقع کی جا رہی تھی۔گھانا کی طرف سے جرمن نیٹ پر متعدد بار خطرناک حملے کئے گئے۔ جرمنی نے بھی جوابی حملے کئے تاہم کھیل کے پہلے ہاف تک کوئی بھی ٹیم گول کرنے میں کامیاب نہیں رہی۔ اس میچ کا واحد گول جرمنی کی طرف سے 60 ویں منٹ میں ہوا۔

گروپ ’ڈی‘ کے ایک اور دلچسپ میچ میں آسٹریلیا نے سربیا کو ایک کے مقابلے میں دو گول سے شکست دے دی۔ لیکن یہ دونوں ہی ٹیمیں ورلڈ کپ ٹورنامنٹ سے باہر ہو گئیں۔ آسٹریلیا کی ٹیم چار پوائنٹس کے باوجود کم گول اوسط کے باعث پہلے ہی ایونٹ سے تقریباً باہر ہو چکی تھی۔ اس کی کم گول اوسط کی وجہ پہلے گروپ میچ میں جرمنی کے ہاتھوں چار صفر کی شکست تھی۔

WM Südafrika 2010 Ghana vs Deutschland Flash-Galerie

جرمن ٹیم فتح کا جشن مناتے ہوئے

دوسری جانب گروپ ’سی‘ میں کھیلے گئے ایک میچ میں انگلینڈ نے سلووینیا کو ایک صفر سے شکست دے کر اگلے مرحلے کے لئے کوالیفائی کر لیا ہے۔ اس گروپ سے اگلے مرحلے تک رسائی حاصل کرنے والی دوسری ٹیم امریکہ ہے۔

امریکہ نے الجزائر کے خلاف کھیلے گئے میچ میں ایک صفر سے فتح حاصل کی۔ اس گروپ میں امریکہ اور برطانیہ بالترتیب پانچ پانچ پوائنٹس کے ساتھ پہلے اور دوسرے نمبر پر ہیں۔ اب جرمنی کو ناک آؤٹ مرحلے کا اپنا پہلا میچ اتوار کے روز انگلینڈ کے خلاف کھیلنا ہے۔

رپورٹ: عاطف توقیر

ادارت: گوہر نذیر گیلانی

DW.COM