1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

فن و ثقافت

بین الاقوامی فلمی میلے Berlinale کی آمد آمد

گیارہ فروری سے برلن میں سالانہ بین الاقوامی فلمی میلہ بیرلینالے شروع ہو رہا ہے۔ اِس میں ایک بار پھر تقریباً چار سو فلمیں دکھائی جائیں گی، جن کا انتخاب دُنیا بھر سے روانہ کی گئی تقریباً چھ ہزار فلموں میں سے کیا گیا ہے۔

default

اِس میلے میں جرمن فلمی صنعت کی ممتاز اداکارہ حانا شیگولا کو فلم کے لئے اُن کی عمر بھر کی خدمات کے بدلے میں ایک اعزازی گولڈن بیئر سے نوازا جائے گا۔ 65 سالہ شیگولا نے نامور ہدایتکار رائنر وَیرنر فاس بِنڈر کے ساتھ بیس فلموں میں اداکاری کے جوہر دکھائے ہیں اور یوں جدید جرمن فلم پر ان کی خوبصورت اداکاری کی گہری چھاپ ہے۔ اُن کا نام یورپ بھر میں جانا پہچانا ہے۔

Berlinale 2009

اِس سال کے میلے کے لئے اب تک دو لاکھ ستر ہزار سے زیادہ سینما ٹکٹ فروخت بھی ہو چکے ہیں

1979ء میں اُنہوں نے فلم ’’دا میریج آف ماریا براؤن‘‘ میں اپنی شاندار اداکاری پر برلن میں بہترین اداکارہ کا ایوارڈ جیتا تھا۔ 1983ء میں ہدایتکار مارکو فیریری کی فلم "Storia di Piera" کے لئے شیگولا کو فرانسیسی کان میلے میں بہترین اداکارہ کے اعزاز سے نوازا گیا۔ 2007ء میں اُنہوں نے ترک نژاد جرمن ہدایتکار فاتی آکین کی فلم ’’دا اَیج آف ہیون‘‘ میں اپنی اداکاری کے لئے بھی زبردست داد وصول کی۔

Berlinale 2007 - Lorenz, Schygulla, Lamprecht

سڑسٹھ سالہ حانا شیگولا (درمیان میں) دو ہزار سات کے بین الاقوامی برلن فلمی میلے میں

حانا شیگولا گولڈن بیئر کا اعزاز اٹھارہ فروری کو برلن میں منعقدہ ایک تقریب میں وصول کریں گی۔ اِمسالہ میلے میں اُن کی منتخبہ فلمیں بھی نمائش کے لئے پیش کی جائیں گی۔

بھارتی فلمی صنعت کی بھی دو فلمیں اِمسالہ میلے کے لئے منتخب کی گئی ہیں: اُمیش کُلکرنی کی ’’وی ہیر‘‘ اور دیو بینیگال کی ’’روڈ، مُووی‘‘۔ اِس بار مقابلے میں شامل فلموں کو جانچنے کے لئے جو جیوری نامزد کی گئی ہے، اُس کی قیادت آسکر ایوارڈ کے لئے نامزد کئے گئے جرمن ہدایتکار وولف گانگ ہیرسوگ کریں گے۔

گزشتہ برس جیوری کی قیادت کے فرائض ممتاز برطانوی اداکارہ ٹِلڈا سونٹن نے ادا کئے تھے۔ اِس بار بھی وہ اِس میلے میں شریک ہوں گی کیونکہ وہ امسالہ میلے میں نمائش کی جانے والی فلم ’’اِیو سونو لامورے‘‘ (مَیں محبت ہوں) میں میلان کے ایک خاندان میں شادی کرنے والی ایک روسی خاتون کا کردار ادا کر رہی ہیں۔

80. Oscar-Verleihung Tilda Swinton beste Nebendarstellerin

دو ہزار آٹھ میں برطانوی اداکارہ ٹِلڈا سونٹن ، بہترین معاون اداکارہ کے آسکر ایوارڈ کے ساتھ

اِس سال کے میلے کے لئے اب تک دو لاکھ ستر ہزار سے زیادہ سینما ٹکٹ فروخت بھی ہو چکے ہیں۔ یوں تماشائیوں کی شرکت کے حوالے سے اِسے دُنیا کا سب سے بڑا فلمی میلہ کہا جا سکتا ہے۔ امسالہ میلے کے موقع پر دُنیا کے ایک سو چھتیس ملکوں سے اُنیس ہزار سے زیادہ شخصیات برلن پہنچ رہی ہیں، جن میں چار ہزار صحافی بھی شامل ہیں۔

ہر سال کی طرح اِس بار بھی "Shorts" کے عنوان کے تحت مختصر فلمیں بھی نمائش کے لئے پیش کی جائیں گی، جن کے مقابلے کے شعبے میں پندرہ ملکوں سے پچیس فلمیں منتخب کی گئی ہیں۔ ان کا انتخاب دُنیا بھر سے بھیجی گئی 2,600 فلموں میں سے کیا گیا ہے۔

اِس بار بھی اِس میلے میں ہالی وُڈ کے مایہ ناز فلمی ستاروں کی شرکت متوقع ہے، جن میں سے زیادہ تر ایسی فلموں کی تشہیر کے لئے برلن آئیں گے، جن میں اُنہوں نے خود اداکاری کے جوہر دکھائے ہیں۔ اپنی نوعیت کا یہ ساٹھواں بیرلینالے اکیس فروری تک جاری رہے گا۔

رپورٹ : امجد علی

ادارت : عاطف توقیر