1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

معاشرہ

بینک ڈکیتی کے خفیہ منصوبے کا پرشور انجام

یورپی ملک البانیہ میں پولیس نے طویل عرصے تک ایک بینک میں ڈاکہ ڈالنے کی منصوبہ بندی کرنے والے دو ایسے ملزمان کو گرفتار کر لیا ہے، جن کا منصوبہ ان کے زیر استعمال ڈرل مشین کے شور کی وجہ سے دھرے کا دھرا رہ گیا۔

default

البانوی دارالحکومت تیرانہ سے ملنے والی رپورٹوں کے مطابق ان دونوں ملزمان نے شہر کے ایک شاپنگ سینٹر میں واقع ایک بینک کو لوٹنے کا پلان بنایا اور اس مقصد کے لئے انہوں نے اس بینک کی عمارت سے عین ایک منزل اوپر ایک دکان بھی کرائے پر لے لی تھی۔

پھر اسی ہفتے ایک رات انہوں نے اپنی دکان کے فرش میں ایک ڈرل مشین کے ذریعے یہ سوچ کر سوراخ کرنے کی کوشش کی کہ ایک منزل نیچے بینک کے اس کمرے میں پہنچ سکیں، جہاں نقد رقوم رکھی جاتی ہیں۔

Roma in Albanien

البانیہ میں غربت خاصی زیادہ ہے

یہ ملزمان بینک کے لاکر روم تک پہنچنے ہی والے تھے کہ ڈرل مشین کے مسلسل اور بے تحاشا شور نے پولیس کو چوکنا کر دیا۔ تیرانہ میں پولیس کے سربراہ ٹونین ووکائی کے بقول ’’طویل منصوبہ بندی‘‘ کرنے والے یہ ڈاکو بینک کے لاکر روم سے ایک فلور اوپر اپنی دکان کے فرش میں اتنا بڑا سوراخ کر چکے تھے کہ وہ اپنے مقصد کے حصول سے زیادہ دور نہیں تھے۔

لیکن پھر رات کے سناٹے میں بند شاپنگ سینٹر کے اندر ڈرل مشین کے شور کا تعاقب کرتے کرتے پولیس اہلکار وہاں پہنچ گئے، جہاں یہ دونوں ملزمان ’مصروف کار‘ تھے۔ نتیجہ رنگے ہاتھوں گرفتاری اور ڈرل مشین کے ضبط کئے جانے کی صورت میں نکلا، جس کے بعد یہ دونوں ’عقلمند مجرم‘ اب جیل میں ہیں اور ایک عدالت میں پیش کئے جانے کے انتظار میں ہیں۔

تیرانہ سے ملنے والی رپورٹوں کے مطابق بینک میں ڈکیتی کی یہ ناکام کوشش معروف مغربی اداکار اور ہدایت کار Woody Allen کی فلم Small Time Crooks کی کہانی سے بہت مماثلت رکھتی ہے، اور ’’عین ممکن ہے کہ اب جیل میں بند دونوں ملزمان نے اس طرح بینک میں ڈاکہ ڈالنے کا منصوبہ یہ فلم دیکھنے کے بعد ہی بنایا ہو۔‘‘

البانیہ زیادہ تر مسلمان آبادی والی اور بحیرہء آڈریا کے علاقے کی ایک ایسی یورپی ریاست ہے، جس کی مجموعی آبادی 3.2 ملین بنتی ہے اور جو انتہائی حد تک غربت کا شکار ہے۔ البانیہ کے مختلف شہروں میں ملک کے سولہ تجارتی بینکوں کی مختلف شاخوں میں، جہاں سکیورٹی انتظامات اکثر برائے نام ہی ہوتے ہیں، گزشتہ چند برسوں کے دوران مسلح ڈکیتی کی وارداتوں میں واضح اضافہ ہو چکا ہے۔

رپورٹ: مقبول ملک

ادارت: عاطف توقیر

DW.COM

ویب لنکس