1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

معاشرہ

بہو پر ’جسمانی تشدد‘ کا الزام جھوٹ ہے، والدہ باکسر عامر خان

پاکستانی نژاد باکسر عامر خان کی والدہ نے ایسے الزامات کی تردید کی ہے کہ انہوں نے اپنی بہو کو جسمانی تشدد کا نشانہ بنایا ہے۔ قبل ازیں فریال مخدوم نے کہا تھا کہ اسے سسرال والے ’جسمانی اور ذہنی‘ تکلیف پہنچاتے رہے ہیں۔

پاکستانی نژاد برطانوی باکسر عامر خان کی والدہ فلک خان نے ایک مقامی ٹیلی وژن کو انٹرویو دیتے ہوئے ایسے الزامات کی تردید کی ہے کہ انہوں نے اپنی بہو کا ’جسمانی استحصال‘ کیا ہے۔ اس سے پہلے عامر خان کی بیوی فریال مخدوم نے سوشل میڈیا پر اپنے سسرال والوں پر ایسے ہی الزامات عائد کیے تھے۔ دو روز پہلے برطانیہ کے مشہور اخبار ’دا سن‘ نے بھی فریال مخدوم کے حوالے ایسے ہی الزامات کو شائع کیے تھے۔

Großbritannien Amir Khan mit Gattin Faryal Makhdoom Pride of Britain Awards 2016 in London (picture-alliance/Geisler-Fotopress)

تاہم باکسر عامر خان کی والدہ نے یہ تسلیم کیا  ہے کہ انہیں اپنی بہو کے کپڑوں کے انتخاب پر اعتراض ضرور تھا

فلک خان کا برطانیہ میں اپنے گھر پر گفتگو کرتے ہوئے کہنا تھا، ’’ کسی نے کبھی  فریال کے لیے نازیبا الفاظ استعمال نہیں کیے۔ ایسا کبھی نہیں ہوا کہ گھر کے کسی فرد نے  اسے ہاتھ  لگایا ہو یا  اس سے برا سلوک کیا ہو۔‘‘  تاہم باکسر عامر خان کی والدہ نے یہ تسلیم کیا  ہے کہ انہیں اپنی بہو کے کپڑوں کے انتخاب پر اعتراض ضرور تھا۔ ان کا کہنا تھا، ’’میں نے ایک مرتبہ اس سے یہ کہا تھا، فریال اس طرح کے کپڑے نہ زیب تن کرو، اسکارف لو۔‘‘ دوسری جانب باکسر عامر خان نے بھی سوشل میڈیا کا استعمال کرتے ہوئے اپنے خاندان سے کہا ہے کہ اس ’بچگانہ رویے‘ کو ختم کیا جائے۔ عامر کا مزید کہنا تھا، ’’میرے والدین میرے والدین ہیں اور میری اہلیہ میری اہلیہ ہے۔ جو کچھ بھی غلط فہمی سے ہوا ہے، اسے نجی سطح پر رکھنا چاہیے۔‘‘

گزشتہ ہفتے فریال نے سنیپ چیٹ کے ذریعے آواز بلند کرتے ہوئے کہا تھا کہ اسے شادی کے بعد سے گھریلو تشدد کا نشانہ بنایا جا رہا ہے۔ فریال نے مزید لکھا تھا، ’’اگر آپ نے بہو کے ساتھ زیادتی ہی کرنی ہے تو اپنے بیٹوں کی شادی ہی نہ کیا کریں۔‘‘ فریال کا کہنا تھا، ’’ جب آپ کی نند آپ کے شوہر کی غیرموجودگی میں آپ کو مارنے کے لیے آئے لیکن پھر بھی آپ اپنے شوہر کی عزت کے لیے اس پر ہاتھ نہ اٹھائیں۔‘‘

عامر خان اور  فریال کی شادی تین برس پہلے نیویارک میں ہوئی تھی اور انسٹاگرام اور فیس بک پر دونوں ہی کے مداحوں کی تعداد میں مسلسل اضافہ ہوتا جا رہا ہے۔