1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

بھارت ٹیسٹ کرکٹ میں پہلی بار پہلے نمبر پر

بھارت سری لنکا کو مسلسل دوسرے میچ میں ایک اننگز سے شکست دینے اور تین ٹیسٹ میچوں کی سیریز دو صفر سے جیتنے کے بعد پہلی مرتبہ ٹیسٹ کرکٹ کی عالمی درجہ بندی میں پہلے نمبر آ گیا ہے۔

default

فائل فوٹو

اتوار کو ممبئی میں کھیلے جانے والے تیسرے ٹیسٹ میچ کے پانچویں اور آخری روز بھارت نے سری لنکا کو ایک اننگز اور چوبیس رنز سے شکست دے دی۔ بھارت کے بہترین بالر ظہیر خان رہے، جنہوں نے اتوار کو مزید تین وکٹیں حاصل کیں اور اپنے کیریئر میں آٹھویں مرتبہ کسی ایک اننگز میں پانچ وکٹیں حاصل کرنے کا اعزاز حاصل کیا۔

سری لنکن کپتان سنگاکارا اپنے کل کے اسکور میں محض چار رنز کا اصافہ کرنے کے بعد ایک سو سینتیس کے اسکور پر آج پہلے ہی اوور میں ظہیر خان کی نپی تُلی بالنگ کا شکار ہو گئے، جس کے بعد سری لنکا کی رہی سہی اُمیدیں بھی ٹوٹ گئیں اور پوری ٹیم تین سو نو رنز بنا کر آؤٹ ہو گئی۔ پہلی اننگز میں سری لنکا کی ٹیم نے تین سو تریانوے رنز بنائے تھے۔

Virender Sehwag

میں آف دی میچ وریندر سہواگ

اِس سے پہلے بھارت نے اپنی واحد اننگز نو وکٹوں کے نقصان پر سات سو چھیانوے رنز بنا کر ڈیکلیئر کر دی تھی۔ اِن میں کپتان مہیندر دھونی کے ناٹ آؤٹ ایک سو رنز بھی شامل تھے۔ تاہم ممبئی کے اِس ٹیسٹ میچ میں مَین آف دا میچ اور مَیں آف دا سیریز دو سو تریانوے رنز بنانے والے اوپنر ویریندر سہواگ قرار پائے، جو محض سات رنز کی کمی سے اپنے کیریئر کی تیسری ٹرپل سنچری بنانے اور یوں ایک نیا ریکارڈ بنانے سے رہ گئے۔

بھارتی کپتان دھونی نے کہا کہ اصل مشکل کام اب شروع ہو رہا ہے اور وہ ہے، اِس کارکردگی کو برقرار رکھنا۔ سری لنکا کے کپتان سنگاکارا نے اعتراف کیا کہ آخری دونوں ٹیسٹ میچوں میں بھارتی ٹیم نے ہر شعبے میں بہتر کھیل پیش کیا۔

سری لنکا کے خلاف یہ سیریز دو صفر سے جیتنے کے بعد بھارت ٹیسٹ کرکٹ کی عالمی درجہ بندی میں جنوبی افریقہ کو ہٹا کر پہلے نمبر آ گیا ہے۔ ممتاز بیٹسمین سچن تندولکر نے کہا کہ وہ بہت خوش ہیں، پہلی پوزیشن پر آنا زبردست بات ہے اور وہ اکیلے ہی نہیں بلکہ پورا بھارت اِس اعزاز کا کئی برسوں سے منتظر تھا۔ آئی سی سی کی اِس عالمی رینکنگ میں سری لنکا، جس کا بھارتی سرزمین پر کوئی ٹیسٹ سیریز جیتنے کا خواب اِس بار بھی شرمندہء تعبیر نہ ہو سکا، اب دوسری سے چوتھی پوزیشن پر چلا گیا ہے۔ تیسری پوزیشن پر آسٹریلیا ہے۔

Sri Lanka Sport Cricket Cricketspieler Muttiah Muralitharan

سیریز میں مرلی کا جادو بھی نہ چل سکا

بھارت اور سری لنکا کی ٹیموں کے مابین پہلا ٹیسٹ ہار جیت کے فیصلے کے بغیر ہی ختم ہو گیا تھا جبکہ دوسرے ٹیسٹ میچ میں بھارت نے ایک اننگز اور ایک سو چوالیس رنز سے کامیابی حاصل کی تھی۔ سری لنکا کی ٹیم ابھی بھارت ہی میں ہے، جہاں وہ دو ٹونٹی ٹونٹی میچوں کے علاوہ پانچ وَن ڈے میچ بھی کھیلے گی، جو آئندہ بدھ سے شروع ہو رہے ہیں۔

رپورٹ : امجد علی

ادارت : شادی خان سیف

DW.COM