1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

معاشرہ

بھارت: نقل سے بچاؤ کے لیے انٹری ٹیسٹ انڈر ویئر میں

بھارتی ریاست بہار میں فوج میں بھرتی کا امتحان دینے سے قبل امیدواروں کے انڈرویئر کے علاوہ تمام کپڑے اتروا لیے گئے۔ فوج کے مطابق اس عمل کا مقصد نقل کی حوصلہ شکنی تھی۔

default

مظفر پور کا انٹری ٹیسٹ

بھارتی میڈیا کے مطابق مشرقی ریاست بہار میں فوج میں بھرتی کے لیے آنے والے امیدواروں کو تحریری امتحان شروع ہونے سے قبل انڈرویئر کے علاوہ تمام کپڑے اتارنے کا حکم دیا گیا۔ ٹیلی وژن اور اخبارات میں شائع ہونے والی تصاویر میں امیدوار کھلے آسمان تلے زمین پر صرف انڈرویئر پہنے امتحان دے رہے تھے۔ یہ امتحان بہار کے شہر مظفر پور میں لیا گیا تھا۔ اِس امتحانی انداز پر بھارت کے سماجی و معاشرتی حلقوں نے حیرت کا اظہار کیا ہے۔

تقریباً گیارہ سو امیدوار فوج کے مختلف شعبوں میں بھرتی ہونے کے لیے پہنچے تھے۔ ان شعبوں میں فوجی، دفتری اور ٹیکنیکل شعبے شامل تھے۔ امیدواروں سے کپڑے اتروا کر امتحان لینے کی وجہ بیان کرتے ہوئے نگرانی پر مامور فوجی حکام کا کہنا تھا کہ یہ عمل نقل کی حوصلہ شکنی کے لیے کیا گیا تھا۔ حکام کے مطابق امیدوار کتابوں کے صفحات تک پھاڑ کر اپنے کپڑوں میں چھپا کر لانے سے گریز نہیں کرتے تھے۔ اس کے علاوہ کپڑے اتارنے سے امیدوار اپنے موبائل فون سے بھی محروم کر دیے گئے تھے۔

Indian Institutes of Technology in Kota

بھارت میں امتحانات کے دوران طلبا میں نقل کا رجحان بہت زیادہ ہو چکا ہے

بھارتی ٹیلی وژن نیٹ ورک این ڈی ٹی وی سے گفتگو کرتے ہوئے ایک امیدوار ہریش امبُو کمار نے کہا جب فوجی حکام نے کپڑے اتارنے کا کہا تو اُس سمیت بقیہ امیدواروں نے خاصی بےچینی اور پریشانی کا سامنا کرنا پڑا لیکن بتایا گیا کہ یہ نقل روکنے کے لیے ہے تو اِس پر ٹیسٹ میں شامل امیدواروں کی ذہنی بےچینی کم ہو گئی۔ فوجی حکام نے امیدواروں کا اِس انداز میں ٹیسٹ لینے کے عمل کا دفاع کیا ہے۔

حکام کے مطابق امیدوار اپنی بنیانوں اور انڈرویئر میں نقل کرنے کی پرچیاں چسپاں کر کے شریک ہوتے رہے ہیں۔ ان کے مطابق نقل کرنے والے امیدوار موبائل فون اپنے انڈرویئر میں رکھ کر باہر کھڑے دوستوں، عزیزوں اور رشتہ داروں سے رابطے استوار کرتے ہوئے جوابات حاصل کرتے پکڑے جا چکے ہیں۔

دوسری جانب بھارتی وزارتِ دفاع نے ریاست بہار کے شہر مظفر پور میں کپڑے اتار کر رنگروٹوں کا امتحان لینے پر مقامی فوجی حکام سے جواب طلب کر لیا ہے۔ وزارتِ دفاع نے اِس صورت حال پر ناپسندیدگی کا اظہار کیا ہے۔ گزشتہ برس بھارت میں دسویں جماعت کے امتحان میں خاندان اور کئی رشتہ دار دیواروں پر چڑھ کر طلبا کی مدد کر رہے تھے کہ ایک اخبار کے فوٹوگرافر نے اُن کی تصویر کھینچ لی تھی۔ اِس تصویر پر سارے بھارت میں حیرت کے ساتھ والدین کے رویے پر غم و غصے کا اظہار کیا گیا تھا۔