1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

بھارت میں ٹرین حادثہ، متعدد افراد ہلاک

بھارتی ریاست اتر پردیش کے ضلع متھُرا کے قریب دو ٹرینوں کے تصادم میں کم از کم 22 مسافر ہلاک ہو گئے ہیں۔ یہ حادثہ بدھ کی صبح مقامی وقت ساڑھے پانچ بجے پیش آیا۔

default

متاثرہ بوگیوں میں متعدد افراد پھنسے ہوئے ہیں

بھارتی میڈیا کے مطابق حادثے کا شکار ہونے والی ٹرینوں کی بوگیوں میں تقریباً پچاس پھنسے افراد کو نکال لیا گیا ہے۔ مقامی ٹیلی ویژن نیوز چینل سہارا سمے سے وابستہ صحافی ونود چوہدری نے ڈوئچے ویلے کو بتایا کہ امدادی ٹیمیں جائے وقوعہ پر پہنچ گئی ہیں اور زخمیوں کو ہسپتال پہنچایا جا رہا ہے جبکہ پھنسے ہوئے مسافروں کو ملبے سے نکالنے کی کوشش بھی کی جا رہی ہے۔

مقامی میڈیا کے مطابق اس حادثے میں متعدد افراد زخمی ہوئے ہیں، جن میں سے کئی ایک کی حالت تشویش ناک بتائی جاتی ہے۔ حکام نے ہلاکتوں میں اضافے کا خدشہ ظاہر کیا ہے۔

پولیس حکام کے مطابق یہ حادثہ اس وقت پیش آیا جب ’گوا ایکسپریس‘ متُھرا ریلوے سٹیشن کے قریب ایک جگہ دوسری ٹرین ’میواڑ ایکسپریس‘ سے ٹکرا گئی۔ ابتدائی اطلاعات کے مطابق دونوں ریل گاڑیاں ایک ہی پٹری سے دلّی کی طرف جا رہی تھیں۔

خبررساں ادارے

ادارت : گوہر نذیر گیلانی