1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

معاشرہ

بھارت میں خواتین پر مشتمل پولیس

بھارت ميں عوامی مقامات اور سڑکوں پر خواتين کو اکثر ہراساں کيا جاتا ہے۔ اس مسئلے سے نمٹنے کے ليے حکام نے صرف عورتوں پر مشتمل ايک فورس تشکيل دی ہے، جس کا کام صنف نازک کے خلاف ہونے والے جرائم کا خاتمہ ہے۔

بھارت ميں پوليس والے عموماً مرد ہی ہوتے ہيں ليکن ملک کے شمال مغربی حصے ميں صرف عورتوں پر مشتمل نئے پوليس يونٹس اب اس روايت کو تبديل کر رہے ہيں۔ جے پور شہر ميں ايسا ايک اسکواڈ تعينات کيا گيا ہے، جس کا کام جنسی جرائم اور جنسی زيادتی کے کيسوں پر متاثرہ افراد کی خاموشی جيسے مسائل سے نمٹنا ہے۔ اس اسکواڈ کی ارکان پوليس اہلکار عورتيں بس اسٹيشنوں، کالجوں، پارکس اور ديگر تفريحی مقامات حتی کہ تمام ايسے مقامات پر گشت کرتی ہيں، جہاں عورتوں کو ممکنہ طور پر ہراساں کيا جا سکتا ہے۔

جے پور ميں تعينات يونٹ کی سربراہ کمال شيخاوت

جے پور ميں تعينات يونٹ کی سربراہ کمال شيخاوت

يہ امر اہم ہے کہ بھارت ايک ايسا ملک ہے جہاں عورتوں کو سڑکوں وغيرہ اور تفريحی مقامات پر اکثر اوقات ہراساں کیا جاتا ہے۔ علاوہ ازيں ان کے خلاف جملے کسنا بھی عام سی بات ہے۔ پچھلے چند برسوں ميں خواتین کے خلاف جنسی زيادتی اور قتل جيسے سنگين جرائم ميں بھی اضافہ نوٹ کيا گيا ہے۔

بھارت ميں سالانہ بنيادوں پر جنسی زيادتی کے چاليس ہزار کيس ريکارڈ کيے جاتے ہيں جبکہ يہ بھی مانا جاتا ہے کہ حقيقی تعداد اس سے کہيں زيادہ ہو سکتی ہے۔ جے پور ميں تعينات يونٹ کی سربراہ کمال شيخاوت کہتی ہيں، ’’ہم بس يہ پيغام دينا چاہتے ہيں کہ عورتوں کے خلاف جرائم کو اب بالکل برداشت نہيں کيا جائے گا۔‘‘

بھارتی پوليس فورس ميں بھاری اکثريت مردوں کی ہے۔ عورتيں مجموعی قوت کا صرف سات فيصد ہيں۔ شيخاوت کا ماننا ہے کہ سڑکوں پر خواتين پوليس اہلکاروں کی موجودگی سے عورتوں ميں حوصلہ بڑھے گا کہ وہ اپنے خلاف ہونے والے جرائم کو رپورٹ کرنے کے لیے آگے بڑھیں گی اور خود بھی اپنا دفاع کر سکيں۔

 کمال شيخاوت کا يہ بھی کہنا ہے کہ عورتيں مقابلتاً سننے کی صلاحيت زيادہ رکھتی ہيں اور متاثرين ان سے بات کرنے ميں ہچکچاہٹ محسوس نہيں کرتے۔

بھارتی شہر جے پور ميں تعينات خواتين پوليس افسران کا يہ يونٹ در اصل ملک کا دوسرا ايسا يونٹ ہے۔ ايسا اوّلين يونٹ گزشتہ برس اکتوبر ميں قائم کيا گيا تھا اور وہ اودے پور ميں تعينات ہے۔