1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

معاشرہ

بھارتی کرکٹر کی شیر کے ساتھ سیلفی، تین سو ڈالر جرمانہ

بھارتی کرکٹر روندرا جدیجا کو شیر کے ساتھ سیلفی اتارنے پر تین سو ڈالر کا جرمانہ کر دیا گیا ہے۔ بھارت کے مغرب میں پائے جانے والے ایشیائی شیر معدوم ہونے کے خطرے سے دوچار ہیں اور ان کی تصاویر بنانے پر بھی پابندی عائد ہے۔

بھارتی حکام نے جون کے مہینے میں اس معاملے کی چھان بین شروع کر دی تھی۔ جون میں بھارت کے نامور کرکٹر روندرا جدیجا نے جنگل کی سفاری کے دوران ایشائی شیر کے ساتھ سیلفی لے کر اپنے انسٹاگرام پر جاری کی تھی، جس کے بعد یہ تصاویر وائرل ہو گئیں تھیں۔

ریاست گجرات میں چیف فارسٹ کنزرویٹر اے پی سنگھ کا نیوز ایجنسی اے ایف پی سے گفتگو کرتے ہوئے کہنا تھا، ’’ہم نے تحقیقات کا آغاز کر دیا تھا اور جدیجا کو اپنا بیان جمع کرانے کا بھی کہا تھا۔‘‘

اے پی سنگھ کا کہنا تھا کہ جدیجا خود تو دستیاب نہیں تھے لیکن ان کے سُسر نے ان کی طرف سے ایک تحریری بیان جمع کروا دیا ہے اور ان کی طرف سے بیس ہزار روپے کا جرمانہ بھی ادا کر دیا گیا ہے۔

فیملی فوٹو کے نام سے شائع کی گئی ایک تصویر میں آل راؤنڈر جدیجا کو مسکراتے ہوئے دیکھا جا سکتا ہے اور ان کے پیچھے ایشائی شیر نظر آتے ہیں۔

اسی طرح ایک دوسری تصویر میں جدیجا اور ان کی اہلیہ نظر آتے ہیں اور ان کے پیچھے شیر ہیں۔

ستائیس سالہ جدیجا اس وقت بھارت کی قومی ٹیم کے ہمراہ ویسٹ انڈیز کے دورے پر ہیں۔ ریاست گجرات کے محکمہ جنگلات نے اس وقت ان شیروں کی تصاویر لینے پر پابندی عائد کر دی تھی، جب ایک شیر کے حملے میں ایک دیہاتی ہلاک اور ایک زخمی ہو گیا تھا۔