1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

’بھارتی فوج کی فائرنگ سے‘ تین پاکستانی فوجی ہلاک

پاکستانی فوج کے ترجمان کے مطابق بھارت کے زیر انتظام کشمیر میں تعینات فوجیوں کی مبینہ فائرنگ کے نتیجے میں پاکستان کے زیر انتظام کشمیر میں تین فوجی مارے گئے ہیں۔ لائن آف کنٹرول پر فائرنگ کا یہ واقعہ بدھ کو پیش آیا۔

default

ایک بھارتی فوجیم فائل فوٹو

جمعرات کو صحافیوں سے گفتگو کرتے ہوئے پاکستانی فوج کے ترجمان میجر جنرل اطہر عباس نے کہا کہ وادیء نیلم میں فائرنگ کا یہ واقعہ اس وقت پیش آیا، جب پاکستانی فوجی ایک چوکی سے دوسری چوکی کی طرف جا رہے تھے۔ انہوں نے کہا کہ بھارتی فوج نے ’بلااشتعال‘ فائرنگ کی۔

اطہر عباس نے تین پاکستانی فوجیوں کی ہلاکت کی تصدیق کرتے ہوئے فائرنگ کے اس واقعہ کی شدید مذمت کی ہے۔ انہوں نے بتایا کہ بھارتی فوج کی طرف سے اچانک فائرنگ کے بعد جوابی فائرنگ بھی کی گئی۔ اطہر عباس نے مزید کہا کہ اس معاملے کو بھارت کے مقامی فوجی کمانڈوں کی سطح پر اٹھایا گیا ہے۔

Pakistan Militärsprecher Athar Abbas in Rawalpindi

پاکستانی فوج کے ترجمان میجر جنرل اطہر عباس

دوسری طرف بھارتی فوج نے دعویٰ کیا ہے کہ فائرنگ پاکستانی فوج کی طرف سے شروع ہوئی۔ بھارتی فوج کے ترجمان جے ایس برار نے خبر رساں ادارے روئٹرز کو بتایا، ’پاکستانی فوجیوں نے فائرنگ کا آغاز کیا، ہم نے صرف اس کا جواب دیا۔ بدھ کی صبح پاکستانی فوج نے مارٹر گولے برسائے، جب ہمارے دستوں نے اس کا جواب دیا تو فائرنگ کا سلسلہ شروع ہو گیا‘۔

اگرچہ جنوبی ایشیا کے ان دونوں ہمسایہ ممالک نے اس علاقے میں فائر بندی کا ایک معاہدہ کر رکھا ہے تاہم اس کے باوجود دونوں ہی ایک دوسرے پر اس معاہدے کی خلاف ورزی کے الزامات عائد کرتے رہتے ہیں۔

رپورٹ: عاطف بلوچ

ادارت: مقبول ملک

DW.COM