1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

بھارتی سمندری حدود سے سینکڑوں ملین ڈالر کی ہیروئن ضبط

بھارت کے کوسٹ گارڈز نے بتایا ہے کہ ملک کے مغربی ساحل سے دور بھارتی پانیوں میں ایک غیر ملکی بحری جہاز سے بڑی مقدار میں ہیروئن قبضے میں لے لی گئی ہے۔

خبر رساں ادارے اے پی کے مطابق قبضے میں لی گئی ہیروئن کا وزن پندرہ سو کلوگرام ہے اور بین الاقوامی منڈی میں اس غیر قانونی نشہ آور مادے کی قیمت ساڑھے چار سو ملین ڈالر سے زائد بنتی ہے۔ جس بحری جہاز کے ذریعے یہ ہیروئین اسمگل کی جا رہی تھی، اُس کی رجسٹریشن پاناما میں ہوئی ہوئی تھی۔ رپورٹوں کے مطابق یہ ہیروئن ہفتے کے روز قبضے میں لی گئی۔

بھارت کے سرکاری خبر رساں ادارے پریس ٹرسٹ آف انڈیا کی ایک رپورٹ کے مطابق بھارتی کوسٹ گارڈز اسے حالیہ برسوں میں پکڑی جانے والے منشیات کی سب سے بڑی کھیپ قرار دے رہے ہیں۔ جہاز کا عملہ آٹھ افراد پر مشتمل ہے اور اس جہاز کو بھارتی ریاست گجرات کے آلنگ شپ یارڈ میں لنگر انداز ہونا تھا۔ عملے کے ارکان کو تفتیش کے لیے گرفتار کر لیا گیا ہے۔

بھارت کے پڑوسی ملک افغانستان میں ہیروئن کے بنیادی جزو افیون کی پیداوار بڑے پیمانے پر ہوتی ہے۔

یہ تفصیلات کہ منشیات کی اس کھیپ کو کہاں سے جہاز پر لادا گیا اور اس کی اسمگلنگ میں کون افراد ملوث ہیں، فوری طور پر معلوم نہیں ہو سکیں۔ بھارتی کوسٹ گارڈز، ملکی بحریہ، پولیس اور بھارتی خفیہ ادارے اس معاملے کی مشترکہ تحقیقات کر رہے ہیں۔

DW.COM

Audios and videos on the topic