1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

بُولے وائیو ٹیسٹ کا پہلا دن، زمبابوے کا پلڑا بھاری

زمبابوے کے شہر بُولے وائیو کے کوئنز اسپورٹس کلب میں جاری پاکستانی ٹیم کے ساتھ اپنے واحد ٹیسٹ میچ میں زمبابوے نے جمعرات کو پہلے دن کے اختتام تک 245 رنز بنائے اور اس کے چار کھلاڑی آؤٹ ہوئے۔

default

پاکستانی کپتان مصباح الحق

زمبابوے کے دورے پر گئی پاکستانی کرکٹ ٹیم کے کپتان مصباح الحق نے اس دورے کے دوران کھیلے جانے والے واحد ٹیسٹ میچ میں ٹاس جیت کر پہلے فیلڈنگ کا فیصلہ کیا۔ مہمان ٹیم کے اوپنرز نے کھیل کا آغاز عمدہ طریقے سے کیا اور پہلی وکٹ کی شراکت میں 71 رنز بنائے۔

اوپنر وی سبانڈا 45 رنز کے انفرادی اسکور پر سعید اجمل کی گیند پر اسٹمپ آؤٹ ہوئے جبکہ دوسرے اوپنر ماویوا نے دیگر کھلاڑیوں کے ساتھ پارٹنر شپ جاری رکھی اور پہلے دن کے اختتام تک 82 کے انفرادی اسکور پر ناٹ آؤٹ رہے۔

زمبابوے کے ون ڈاؤن بلے باز ماسا کاڈزا نے گیارہ رنز بنائے، انہیں سعید اجمل نے بولڈ کیا۔ کپتان بریڈن ٹیلر بھی سعید اجمل ہی کی ایک عمدہ گیند پر ایل بی ڈبلیو آؤٹ ہوئے، انہوں نے دس رنز بنائے۔ پہلے دن کی آخری وکٹ سہیل خان کے حصے میں آئی، جنہوں نے تابو کو 44 کے ذاتی اسکور پر واپس پویلین بھیج دیا۔ تابو کا کیچ وکٹ کیپر عدنان اکمل نے لیا۔

Flash-Galerie Cricket Spieler Pakistan Saeed Ajmal

سعید اجمل نے تین کھلاڑیوں کو آؤٹ کیا

پہلے دن کے اختتام پر سلامی بلے باز ماویوا کے ساتھ اروین 38 رنز بنا کر ناٹ آؤٹ ہیں۔ اپنا پہلا ٹیسٹ میچ کھیلنے والے پاکستانی بولر جنید خان اور عزیز چیمہ کو کوئی کامیابی نہ ملی۔ عزیز چیمہ نے پندرہ اوورز کیے اور جنید خان نے اکیس۔ دونوں نے بالترتیب 48 اور 39 رنز دیے۔

پہلے دن کے اختتام پر زمبابوے کی پوزیشن مستحکم ہو گئی ہے۔ دوسرے دن کے کھیل میں اگر پاکستانی بولرز پہلے سیشن میں وکٹیں حاصل کرنے میں ناکام رہے تو پاکستانی کرکٹ ٹیم کی اس میچ پر گرفت مزید کمزور پڑ سکتی ہے۔

رپورٹ: عاطف بلوچ

ادارت: مقبول ملک

DW.COM